Неидентификувани дронови предизвикаа безбедносна тревога во Литванија и Латвија во текот на ноќта меѓу вторникот и средата. НАТО активираше борбени авиони, а жителите на повеќе подрачја добија предупредувања за можна воздушна опасност. Засега не е потврдено кому му припаѓале леталата.
Тревога во Литванија и прекин на летовите
Литванските власти издадоа предупредувања за повеќе региони, меѓу кои и подрачјето на Каунас, вториот по големина град во земјата. Граѓаните во загрозените области беа повикани да побараат засолниште.
Првата жолта тревога беше објавена околу 23 часот за регионите Вилнус и Утена. Подоцна следуваа нови предупредувања, а во делови од земјата нивото на опасност беше зголемено на црвено.
Инцидентите предизвикаа и привремено затворање на аеродромите во Вилнус и Каунас. Според литванските власти, еден дрон влегол од правец на Белорусија, прелетал преку повеќе региони и продолжил кон Латвија.
Латвија потврди влез на три дрона
Латвиските вооружени сили соопштија дека три беспилотни летала влегле во воздушниот простор на земјата. Две краткотрајно ја преминале источната граница, додека третото пристигнало од Литванија и продолжило на север, кон Естонија.
Биле активирани противвоздушната одбрана, единици со дронови-пресретнувачи и авионите од мисијата на НАТО за патролирање над Балтикот.
Предупредувањата се менувале според движењето на леталата. Во првичната порака за Јекабпилс и Мадона било наведено дека не се потребни дополнителни чекори, но подоцна во Мадона нивото на опасност било зголемено. По заминувањето на дронот, предупредувањата биле укинати.
Властите ги повикаа граѓаните да ги следат официјалните известувања и да не допираат сомнителни предмети или остатоци од летала, туку да ги пријават на бројот 112.
…
