Струмичанец на возраст од околу 60 години денеска околу пладне загинал во пожар во неговиот дом, предизвикан од греалка.

Веста ја потврдија од струмичката полиција, кратко информирајќи дека денеска во 12:35 часот било пријавено дека на улица „Широк дол“ има починато лице и дека е извршен увид.

Митко Димчев, инспектор за пожари во Дирекцијата за заштита и спасување (ДСЗ), вели дека според првичните информации, најверојатно станува збор за несреќен случај, односно за пожар предизвикан од вклучена греалка, во кој несреќниот човек се задушил.

Од струмичката противпожарна единица информираа дека во гаснењето на пожарот, во кој изгорела просторија во куќата, интервенирале со четворица пожарникари и едно противпожарно возило.

-За жал, при интервенцијата внатре во просторијата, е пронајдено мртво лице чие тело беше зафатено од пламенот, велат струмичките пожарникари.

Смртта на струмичанецот ја констатирал лекар, а покрај полицијата, увид извршил и јавен обвинител од ОЈО Струмица.

На првиот ден од новата 2025 година, низа апсења низ главниот град. 

– На 01.01.2025 во 11 часот во Скопје, на подрачјето на Центар, полициски службеници од Единицата за интервентна полиција при СВР Скопје, го лишиле од слобода Н.В.(23) од Скопје, затоа што кај него била пронајдена и одземена марихуана. 

– На 01.01.2025 во 20 часот во Скопје, на подрачјето на Карпош, полициски службеници од Единицата за интервентна полиција при СВР Скопје, го лишиле од слобода Р.Е.(26) од село Крушопек, скопско, затоа што кај него била пронајдена и одземена марихуана.

– На 01.01.2025 во 11 часот во Скопје, на подрачјето на Центар, полициски службеници од Единицата за интервентна полиција при СВР Скопје, го привеле А.М.(24) од Кичево, затоа што кај него бил пронајден и одземен нож.

По целосно документирање на сите одделни случаи ќе следува соодветен поднесок против сторителите. 

По најавите на УХМР за врнежи од дожд и снег во наредните денови, агрометеоролозите препорачуваат превентивни мерки за зацврстување на пластениците и другите конструкции. Треба, велат, да се расчистат и одводните канали за полесно одлевање на површинските води.

Врнежите, сепак, оценуваат агрометеоролозите, се добредојдени, го зголемуваат полскиот воден капацитет кај сите земјоделски култури. Појавата на снег на планините исто така ги зголемува резервите на вода кои би ги подобриле хидролошките услови.

-Ова е период од годината кога есенските култури, лозовите насади и овошките се во фаза на зимско мирување. Животните функции (дишење, транспирација) се сведени на минимум, но не се прекинати. Коренот кај овошните видови црпи извесна количина вода за одржување на тургорот во круната. Во овој период овошките бараат одредена сума ниски температури за да можат нормално да вегетираат во идната година, објаснуваат агрометеоролозите.

Според УХМР, под влијание на влажен бран, утре попладне во западните делови ќе има врнежи од дожд на пониските места и снег на планините. Во текот на ноќта кон сабота и во сабота претпладне врнежите ќе се прошират во поголем дел од земјата и наместа ќе бидат пообилни (20 л/м2). Поради спуштање на постудена воздушна маса со засилен северен ветер врнежите ќе преминуваат во снег на повисоките и на некои од пониските места. На планините снежната покривка ќе се зголеми, а помала снежна покривка ќе се формира и на некои од повисоките места.