Цели два дена траеше потрагата „под дрво и под камен“, по сите паркови, улици и околината на училиштето „Лирија“. Денес околу пладне, полицијата ги пронајде малолетничките кои беа главна тема во јавноста, со апели за нивно пронаоѓање. Излезени од дома и отидени на училиште во четвртокот, за потоа да им се изгуби секоја трага. Ги бараше полицијата, роднини, членови на навивачка група – за дури денес да бидат лоцирани.

ПРОНАЈДЕНА Е СО ПОМОШ НА ГРАЃАНИ, ИНТЕРВЕНИРАЛА И ПОЛИЦИЈАТА. СЕГА СМЕ ВО ПОЛИЦИЈА, ЧЕКАМЕ ДА ПОМИНЕ ЦЕЛАТА ПРОЦЕДУРА И ДА ЈА ЗЕМЕМЕ ДОМА. ВИКААТ ДЕКА Е ВО ДОБРА СОСТОЈБА. ИМАМ ВНУК ПОЛИЦАЕЦ, ВЕЛИ ДЕКА Е ДОБРО, НО МОРА ДА ПРОЈДЕ ПРОЦЕДУРАТА, НИ ИЗЈАВИ САБИТ АЈРО, ДЕДОТО НА АНИСА.

Од МВР со повеќе детали го потврдија настанот. Претходно, од полицијата имаше официјално известување за 12 годишната Аниса и 15 годишната Мелиса. Втората, во повеќе наврати исчезнувала и потоа била враќа дома.

ПОЛИЦИЈАТА ГИ ПРОНАЈДЕ ДВЕТЕ ИСЧЕЗНАТИ МАЛОЛЕТНИЧКИ НА ПОДРАЧЈЕТО НА БИТ ПАЗАР, ДЕНЕС ВО 13:30 ЧАСОТ НА УЛ. „ЏОН КЕНЕДИ“, КАЈ ПРОДАЖЕН ОБЈЕКТ ВО ПАРКОТ. ПОЛИЦИСКИ СЛУЖБЕНИЦИ ОД ПОЛИЦИСКАТА СТАНИЦА „БИТ ПАЗАР“ ГИ ПРОНАЈДОА МАЛОЛЕТНИЧКИТЕ, ЗА КОИ НА 30.03.2023 ВО ВЕЧЕРНИТЕ ЧАСОВИ БЕШЕ ПРИЈАВЕНО ДЕКА СЕ ОДДАЛЕЧИЛЕ, СООПШТИЈА ОД МВР.

И покрај денешната добра вест за нивното пронаоѓање, многу прашалници остануваат да висат над овој случај. Каде заминале, што правеле самите речиси три дена надвор, каде спиеле, што јаделе. Додека траеше потрагата по нив, камерата на Телма снимаше во дворот на училиштето од каде што им се изгуби трагата.

Мирни и повлечени девојчиња коишто се дружат со многу деца. Вработени од училиштето вака ги опишуваат исчезнатите девојчиња кои последен пат се видени овде во училишниот двор.

Претходно денес, дедото на Аниса изјави дека се следи нејзиниот телефон, кој повремено се вклучува и исклучува – а, изрази и сомнеж за нејзиното исчезнување затоа што како што вели – таа се плаши самата да оди во тоалет за да се искапе, а не пак надвор сама. За овие сомнежи, на потег се службите коишто ќе трагаат по одговорите.

Семејство од Тетово обвини дека нивен член вчера навечер починал во тетовската болница, затоа што не добил помош од лекарите, објави вечерва порталот на албански јазик Тетовасот. Станува збор за шеесет годишен маж од Пирок, за кого од семејството изјавиле дека починал околу 19 часот.

-Доле чекавме еден час, побаравме помош, никој не излезе да ни помогне. Членот на семејството пред еден час падна во кома, чекавме долу, ниту еден лекар не излезе да ни помогне, по некое време тој почина поради доцнењето на лекарите од над половина час, изјави еден од членовите на семејството, за Тетовасот.

Директорот на тетовската болница, Плумб Вела, за МИА информираше дека вчера навечер по дознавање за случајот заминал во установата за да утврди што се случило.

-Ќе се преземат мерки и ќе се формира комисија која ќе утврдува дали има вина кај лекарите за смртта на 60-годишникот, изјави директорот Плумб Вела.

Директорот Вела е нов раководител на Клиничка болница, а на таа функција е само неколку дена односно од 28 март.

Ниту криза ниту инфлација не ги чепка македонските функциониери по последната одлука на Уставниот суд со која нивните плати во просек ќе се зголемат за неверојатни 78%, објавува Сител.

Па така од први, Претседателот кој има највисока плата во државата ќе добие зголемување од 72.500 денари па неговата плата од околу 93.000 ќе скокне на над 165.000 денари.

Многу повеќе пари дома ќе однесат и министрите и премиерот. Нивните плати од околу 65.000 денари сега ќе скокнат за дополнителни 50.000 денари па од први на сметките секој месец ќе им префрламе по близу 2000 евра нето плата.

Зголемување ќе добијат и пратениците кои на сегашната плата од околу 60.000 денари ќе добијат плус 700 евра месечно и дома ќе однесат нето плата повисока од 1.700 евра.

Близу 80% повисока плата ќе добијат и сите заменици министри, градоначалници, директори во државни фирми и агенции. Меѓу оние кои ќе добијат повисока плата се и сите судии меѓу кои и тие од Уставниот суд кои практично со укинување на 2 члена од Законот за плати на функционерите го овозможија општото покачување.

Иницијативата до нив ја поднел адвокат од Скопје кој не сакаше да коментира. Интересно е што Уставниот суд по иницијативата одговорил во рекорден рок од само 4 месеци, додека други иницијативи пред уставните судии чекаат и по неколку години.

„Закон е закон и мора да го почитуваме“, објасни потпретседателот на Владата кој идниот месец дома ќе однесе близу 2.100 евра плата, или околу 900 евра повеќе.

Со месеци протестираме за покачувања од 2000 денари, а тие, преку ноќ платите си ги зголемија за 80%, реагира Синдикатот на вработените во јавниот сектор.

Дел од функционерите кои следниот месец треба да добијат повисоки плати, почнаа јавно да се откажуваат од покачувањето.

„Зголемувањето на платата, согласно одлуката на Уставниот суд во целост ќе го донирам за хуманитарни цели, семејства со ниски месечни примања и семејствата на уставобранителите. Имајќи ја предвид тешката економска и финансиска состојба во која живееме, почнувајќи од следниот месец разликата во платата ќе ја донирам за хуманитарни цели“, напиша на социјалните мрежи градоначалникот на Аеродром, Тимчо Муцункски.

Уставниот суд на седницата на 21 март донел одлука со која укина член од законот кој ја држеше основицата за пресметување на платите на функционерите на ниво од околу 26.000 денари. Потоа, оваа основица се множи со коефициент кој најчесто е меѓу 3 и 4 и се добива бруто платата на функционерот. Сега, по одлуката на судот, основицата од околу 26.000 скокна на над 46.000 денари а со тоа и платите на функционерите.