Покрај законското зголемување од 2.000 денари во март следната година, во буџетот има пари за зголемување на минималната плата и во декември, како што бара Синдикатот, изјави министерот за економија Бесар Дурмиши, кој вели дека сака минималната плата да се зголеми на 600 евра, но нагласи дека треба договор и законски измени и за барањето на Синдикатот минималната плата да биде 450 евра.

„Ако во рамките на Економско-социјалниот совет договориме да се зголеми минималната плата, претходно треба да се смени Законот за минималната плата. Кога ќе се направат измените, може да се зголеми минималната плата на 450 евра. Има политичка волја. Што се однесува до мене, јас сакам минималната плата да биде 600 евра“, рече Дурмиши.

Економско-социјалниот совет на седница следниот месец ќе одлучува за покачувањето на минималната плата на 450 евра.

Претседателот на Сојузот на синдикатите на Македонија (ССМ), Слободан Трендафилов, вели дека има позитивни чекори од страна на Владата со зголемувањето на платите на здравствените работници.

„Во образованието не сме задоволни со растот на платите. Се надеваме дека на ваков начин до крајот на годината ќе биде исправена неправдата за сите работници што не добија усогласување на нивните плати оваа година поради изборите. Дијалогот по основ на минималната плата е отворен, аргументите се на наша страна. Ако знаете дека во Црна Гора минималната плата е веќе 800 евра, ако знаете дека минималната плата во Босна од 1 јануари ќе биде 600 евра, ако знаете дека во Србија е 454 евра, мислам дека синдикалната минимална кошничка, која изнесува 62.000 денари, покажува дека платите мора да се зголемат. Разговараме во однос на ова прашање поврзано и со мерките на Владата за ограничување на маржите на производите и мислам дека на наредната седница на Економско-социјалниот совет ќе ги презентираме нашите аргументи со кои располагаме за да ги убедиме бидејќи мораме да се убедуваме за потребата од растот на сите плати, вклучително и растот на минималната плата“, рече Трендафилов.

Костал Македонија влегува во третата фаза на инвестицискиот циклус вредна помеѓу 45 и 50 милиони евра, со што се отвора простор и за нови 250 работни места. Во Охрид ќе се произведуваат и оттаму до сите локации на Фолксваген ќе се доставува најсофистицирана опрема за автомобилска електроника, која ќе се вградува во најсовремените модели на возила. Во овие рамки ќе се реализира уште еден проект, поврзан со „Мерцедес“, вели генералниот директор на Костал Македонија, Виктор Мизо.

„За Фолксваген групацијата, за сите возила од новата програма, сѐ ќе се прави во Охрид и ќе се доставува на сите нивни локации. Вториот проект во овие рамки е производството на напредни мехатронски системи за Мерцедес“, изјави Мизо пред денешното официјално означување на стартот од оваа фаза во нивните активности.

Со ова вложување вкупната инвестиција на германската групација ќе надмине 150 милиони евра. Притоа, значаен е и бројот од околу 1.300 работни места. Дел од потребната опрема за производство е веќе донесена во охридската фабрика, а исто така, реализирани се и дел од вработувањата.

На денешниот настан присуствуваше и премиерот Христијан Мицкоски.

„Она коешто го видов внатре прво ме инспирира како универзитетски професор, како човек којшто предава предмети од полето на мехатрониката, навистина импресивно. Би рекол заедно со најсовремените и најмодерните светски текови се произведува овде кај нас во Охрид. Повеќе од 1150-тина вработени го произведуваат тоа. Директорот тоа го кажа каде сè се вградува сето тоа како модули во кои возила, во кои марки на возила, брендови, зборуваме за светските топ бренд возила, Мерцедес, Фолксваген итн. Нешто што е навистина импресивно. 

Импресивни се и плановите за во иднина. Импресивни се и новите инвестиции од 50-тина милиони евра во следниве 4 години, но и планот за извоз поголем од половина милијарда. 

Кога на сето ова ќе се додадат и други можни инвестиции во Македонија од страна на „Костал“ тоа значи дека ние како Влада треба да имаме, но и мислам дека имаме, посебен пристап кон однесувањето на инвеститорите без разлика дали се тоа странски или домашни, но ваков тип на инвестиции треба да ги поддржуваме и да ги охрабруваме што повеќе да инвестираат и да ги задржиме тука кај нас. Затоа што многу лесно ако ние се однесуваме неодговорно како што изминатите години бевме сведоци се однесуваа претходните Влади, тогаш многу лесно можеме и да ги изгубиме.

Јас како претседател на Владата апсолутно многу пати во минатото сум го кажал, ќе го кажам и ќе го повторам тоа и сега дека сè што можеме како Влада да бидеме пријатели на бизнисот на економијата, го правиме и ќе продолжиме тоа да го правиме, бидејќи денешниот современ патриотизам е токму тоа. Инвестирање, обезбедување на добро платени работни места и извоз. Само така можеме да бидеме во радарот и на мапата на светските случувања. Сè останато е импровизација“, посочи Мицкоски.

За жал, состојбата на објектот на МНТ е очајна. Најголемиот театар во Македонија е оставен да пропаѓа бавно, но сигурно. Ова е жално, независно од тоа кој го изградил театарот. Се работи за недомаќинско работење од страна на претходната власт, бидејќи со ова се покажува негрижа кон нашата верна публика, која е присутна секоја вечер. Нехумано и небезбедно е да влегуваат во објект кој што се распаѓа, вели директорот на МНТ, Никола Кимовски за Република

Тој смета дека проблемот настанал со тоа што не е склучен договор на тендер со фирма за одржување на објектот и како што минувале годините и оштетувањата станувале поголеми веќе ни фирмите не сакале да склучат договор за одржување.

Сега, вели, се фокусирани на реновирањето на театарот и санација, отколку на откривање и посочување со прст на виновникот на сето ова.

Според министерот за култура и туризам, Зоран Љутков, ситуацијата трае веќе веќе 7- 8 години.

Иако се знаеле позициите дека некаде капе, дека има проблем, иако имало обезбедувано средства за поправки, тоа не се случило во овие седум години. И можам да заклучам дека со тенденција се држел Македонскиот народен театар да биде во ваква очајна состојба. Тој е изграден со многу љубов, не велам дека немало пропусти при изградбата, можеби имало. Во однос на буџетот, имало години кога имале по 20 милиони денари за продукција. Во 2017 имало 14 милиони денари, а денес имаме 4 милиони денари. Можеле да се затворат тие балкони, да се застаклат и да се забрани дотокот на вода, таа е помала инвестиција. Поголемата инвестиција е во однос на штетата што е предизвикана од тоа што не било интервенирало на време и затоа ќе одиме фаза по фаза, рече Љутков, кој вети дека ќе се врати сјајот на институциите.

Новата зграда на МНТ се распаѓа заради неспособност за одржување на високите стандарди кои се поставија во технологијата која ја поседува, а следна слична е во Виена. Културата ни се распаѓа, напиша тогаш Михајловски на својот профил на Фејсбук.

Македонскиот народен театар, пак, во 2021 соопшти дека со 1,2 милиони денари во рамките на Годишната програма на Министерството за култура започнала санацијата на проодната тераса која се наоѓа на северно-источниот дел од првиот кат на објектот. Со зафатот требаше да се надминат проблемите наследени од самото отворање на театарот, како и натамошното руинирање на објектот бидејќи при обилни дождови беше предизвикана материјална штета од протекување од терасата во главното фоаје.