Вицепремиерот и идниот министер за европски прашања, Беким Сали, е избран за вршител на должност претседател на Алтернатива, по оставката на долгодишниот лидер Зеќирија Ибрахими на Централното собрание на партијата.

Ибрахими образложи дека се повлекува поради лични политички убедувања и уверување дека партијата и коалицијата ВЛЕН имаат потреба од нова енергија и ново раководство. Тој наведе дека планирал да не се кандидира на редовниот конгрес во март или април 2026 година, но динамиката во рамките на ВЛЕН го забрзала процесот.

Со силна поддршка од органите на партијата, за привремен лидер беше избран Беким Сали, долгогодишен соработник на Ибрахими, кој ќе го води партиското работење до одржувањето на конгресот.

Во својата објава, Ибрахими се осврна на 11-годишното политичко делување, нагласувајќи дека заминувањето не е резултат на незадоволство, туку на потребата за „втора етапа“ во политичката организација на Албанците во земјата. Според него, младите треба да добијат поголемо влијание, а во Алтернатива веќе се промовирани нови лица кои може да станат идни лидери.

Тој изрази благодарност до соработниците, членството и партнерите од ВЛЕН, како и до своето семејство, упатувајќи и барање за прошка до сите што можеби ги повредил во политичките дебати. Ибрахими останува активен во партијата и во коалицијата, со фокус на едукација на младите и пренесување на своето политичко искуство.

Рано утрово, во 02:23 часот, апликацијата за сеизмичка активност регистрираше слаб земјотрес што го почувствува западниот дел на земјата.

Според првичните податоци, земјотресот бил со јачина од 2,0 степени по Рихтеровата скала, што укажува на многу слаб интензитет. Хипоцентарот бил релативно длабоко, на 15 километри под површината.

Епицентарот е прецизно лоциран во регионот помеѓу Кичево и селата кои гравитираат кон Мавровскиот предел. Географските координати се 41.394°N и 20.872°E, а од референтната точка настанот се случил на околу 80 километри оддалеченост.

Најважната вест е што засега нема никакви информации за предизвикани материјални штети или други последици по населението.

Системот „Безбеден град“ кој е во тест фаза пред да стартува на 1 јануари или еден месец подоцна, во моментов не ја дава можноста да се внесуваат броеви од регистарски таблици кои би биле изземени од генерирање на прекршочни казни. 

Секое возило кое ќе биде снимено дека ги прекршува законите и сообраќајните правила ќе добие соодветно известување за казна. Но, ова ќе се промени во иднина кога регистарските таблици на возилата со првенство на минување, како што се брза помош, пожарна и полициски возила ќе бидат внесени во системот и за нив нема да се процесираат казни. Во системот ќе има докази дека ги возилата со тие регистарски таблици ги прекршиле сообраќајните правила.

„Во иднина, согласно позитивните законски прописи, односно од одредбите од Законот за безбедност во сообраќајот и на патиштата, возилата со првенство на минување ќе се евидентираат во системот и за истите записите нема да се бришат. Тие ќе се чуваат во лог менаџмент“, вели Маја Арсовска Манов.

Но, ова го отвора прашањето од можни злоупотреби на оваа опција. Односно, вработени кои имаат пристап до системот, по нечија наредба или самоволно, да внесуваат регистарски таблици кои не се на возила со првенство на минување, односно на политичари, на влијателни лица, но и на свои пријатели и другари. Од МВР ветуваат дека ќе има контролни механизми.

„Тоа се реформите кои во моментов се на сила, на кои се работи на нив. Меѓутоа, сепак Министерот за внатрешни работи ќе одлучи кои и во каков вид ќе се врши контролата. А контрола, секако дека ќе има. “, вели Маја Арсовска Манов.

Инаку, една од најголемите реакции на социјалните мрежи околу системот „Безбеден град“ е непостоењето на сообраќајна инфраструктура, пред се таканаречен „Зелен бран“. Тоа значи семафорите да се координираат така што зеленото светло се активира последователно, создавајќи „бран“ од зелени сигнали за возилата кои се движат со препорачана брзина, често од 40 до 50 километри на час во урбани услови. Ова го намалува метежот, штеди гориво и го подобрува протокот на главните сообраќајници.

Од Град Скопје, во чија надлежност е воспоставувањето на ваквиот систем, за ТВ21 велат дека.

„Во Сообраќајниот центар при улици и патишта во моментов се работи на решение за повторно воведување на таканаречениот „Зелен бран“ во Скопје, кој ќе ги опфати најфреквентните улици во главниот град. Се очекува наскоро решение“ Во Скопје оваа опција со „Зелен бран“ постоеше пред десетина години, по што престана да функционира.