Не дојде датумот кога требаше да ни дадат датум на кој ќе ни го дадеа датумот за преговори со ЕУ. Навикнавме, иако не ни е сеедно што Македонија е мафтосувана и од Брисел и од домашни политичари со ветувања дека еве само што не дошол „датумот“.

Земјите-членки на ЕУ на вчерашното заседание на Советот за општи работи (ГАК) не постигнаа договор за одржување на првите меѓувладини конференции со Македонија и Албанија до крајот на оваа година. Во заклучоците од состанокот изостана временската одредница „до крајот на годината” како рок за одржување на првата меѓувладина конференција со Скопјеа. Причина за ново разочарување е непроменетиот став на Бугарија во однос на Македонија и нејзините бројни и категорични барања кои требало да ги исполни нашата земја.

Премиерот на Холандија среде Скопје пред неколку недели не уверуваше дека Брисел не дозволува Софија да прави се што сака… Но…

И така… Решавањето на наметнатото бугарски вето сега треба да тргне од нов „почеток“ откако Бугарија доби нова Влада на чело со премиерот Кирил Петков. Се очекува наскоро ќе се реконструира и македонската Влада и прашање е дали Зоран Заев и натаму ќе ја води како „премиер во оставка“ или таа ќе има нов претседател. Се чини ќе имаат долго време за новиот почеток – односно преговарање бидејќи бугарскиот премиер Петков во првите изјави веќе определи нов шестмесечен рок за решавање на спорот со Македонија.

-Ќе предложам нова процедура со многу краток краен рок од само 6 месеци. Ќе користиме работни групи кои што ќе најдат решенија по прашања како заедничка економска активност, инфраструктура, култура и историја, најави Петков.

Ова го поддржа и премиерот во оставка Заев кој изразил подготвеност за забрзување на комуникацијата и соработката на ниво на работни групи во областите економија, култура, енергетика и инфраструктура. Од ова произлегува дека во наредниот период ќе треба да се оформуваат преговарачки тимови од двете страни.

Влегување на нови личности во преговарачкиот процес, се чини, одамна беше потребно. Очигледно е дека во она што како преговори до сега го водеа Заев, Бујар Османи, Никола Димитров и Владо Бучковски е го најде решението. Очигледно е дека ангажирањето на нови личности може да го раздвожи процесот при што свое место треба да најдат и претставници на опозицијата. Тоа, како и јавност во преговорите за да се знае што се се става на маса и што се договара го бараат и граѓаните.

–Преговорите треба да бидат транспарентни. Треба да бидат вклучени сите релевантни умови без разлика кој од каде е, потенцира скопјанката Велика Спиреска.

Од друга страна, кога веќе станува извесно дека идните преговори ќе се водат од страна на повеќе тимови од различни области, се отвора прашањето за потребата од натамошен ангажман на специјалниот владин претставник Владо Бучковски. Се гледа дека ориентацијата е во меѓудржавните договори да се вклучат што повеќе лица и во таква ситуација веќе е непотребно главната улога да ја има една или две-три личности кои ќе решаваат за се

Скопско ехо