ЈСП остана без нафта повторно. Најголемиот дел од автобусите веќе се паркирани во гаражите, а останатите ќе снемаат гориво за два до три часа, дознава Сител.

Информацијата за Сител ја потврдија Синдикатот на вработените во ЈСП Скопје и Независниот синдикат на возачи.

Миќо Стојановски од синдикатот на вработените во ЈСП откри дека синоќа автобусите се повлекле порано од своите линии со цел да заштедат гориво повеќе за денеска да можат да возат барем една смена.

Стојановски вели дека од пред неколку дена ЈСП нема ниту директор. Договорот на Драги Кушовски бил истечен и тој веќе не доаѓал на работа. А нов директор нема.

Сител се обиде да контактира со Кушовски, но тој не одговорил на телефонските повици.

Паркирањето во Општина Центар за време на новогодишните и божиќни празници ќе биде без наплата за сите граѓани.

Согласно Одлуката на претпријатието, на 01.01.2025 година (среда) сите паркиралишта со кои стопанисува ЈП ПОЦ ќе бидат без наплата за сите граѓани.

Редовната наплата за паркирање на паркиралиштата и издавање на договори во Дирекцијата на ЈП ПОЦ ќе продолжи на 02.01.2025 година (четврток) со вообичаено работно време.

За време на божиќните празници на 06.01. (понеделник), 07.01. (вторник) сите паркиралишта со кои стопанисува ЈП Паркинзи на Општина Центар ќе бидат без наплата за граѓаните. Редовната наплата за паркирање на паркиралиштата и издавање на договори во Дирекцијата ќе продолжи на 08.01.2025 година (среда) со вообичаено работно време.

Депото на „Пајак“ службата на ЈП ПОЦ ќе работи 24/7 за време на празниците како и паркиралиштето Дилајла кое е со автоматска наплата. Тимот на ЈП Паркинзи на Општина Центар Ви посакува среќни новогодишни и божиќни празници.

Градоначалникот на општина Кисела Вода, Орце Ѓорѓиевски, заедно со Премиерот Христијан Мицкоски, директорот на Агенцијата за катастар и недвижности Иван Живковски, пратеничката Бети Стаменкоска Трајкоска и претседателката на Советот Светлана Колариќ, денеска посетија неколку домови во општината каде што им подарија новогодишни пакетчиња на дечињата.

„За ова е целата наша заложба – за среќата и најискрените насмевки од дечињата! Овие моменти носат радост, не само за нив, туку и за сите нас кои сме дел од ваквите активности,“ изјави Ѓорѓиевски.

Во текот на посетата, покрај дарувањето, градоначалникот и останатите гости се дружеле со дечињата, посакувајќи им многу здравје, радост, среќа и успеси во новата година.

„Новогодишните и божиќните празници се најубавиот период од годината, особено за најмладите, кои ќе ги паметат подароците под елката, семејните моменти и радоста на дарувањето. Секое дете заслужува среќно детство и убави спомени, а ова е наш мал придонес за нивната среќа,“ додаде Ѓорѓиевски.

Оваа иницијатива е дел од празничните активности на општина Кисела Вода, кои имаат за цел да донесат радост и топлина во домовите на најмладите и нивните семејства. Градоначалникот упати порака за бериќетни и среќни празници, нагласувајќи ја важноста на заедничките моменти и грижата за секое дете.