РЕК Битола го раскина договорот со „Марковски Компани“ за ископ на јаглен и јаловина поради сериозни пропусти и несовесно извршување на обврските. Директорот на термоелектраната, Тони Петрушевски, соопшти дека со раскинувањето на договорот активирана е банкарската гаранција од речиси 2 милиони евра.

„Оваа компанија не само што не ги исполни договорените количини јаглен, туку и директно ја загрозила енергетската стабилност на државата. Несоодветната динамика на отстранување на јаловината ја наруши геомеханичката стабилност на рудникот „Брод Гнеотино“, изјави Петрушевски.

Тој додаде дека на раскинувањето му претходеле бројни опомени и укажувања, но фирмата продолжила со несовесен однос кон обврските. Договорот, склучен на 13 февруари годинава, овозможувал раскинување доколку една од страните не ги извршува обврските.

Тендерот вреден 46 милиони евра се однесува на ископ на јаглен во рудникот „Брод-Гнеотино“. Сепак, според податоците на Бирото за јавни набавки, „Марковски Компани“ има склучено повеќе од десет други договори со РЕК Битола, кои се уште се активни. Последните три тендери, кои фирмата ги доби за неколку месеци, тежат околу два и пол милиони евра.

„Марковски Компани“ во изминатите години стана најголемиот добитник на тендери за ископ на јаловина, со вкупно 20 договори вредни 52 милиони евра. Ова предизвика критики од опозицијата, која тврди дека тендерите биле „местени“ и користени за лична добивка, особено за време на владеењето на СДСМ.

Секоја година, отприлика ова време, УНЕСКО заседава за да разгледа и усвои предлози за нови елементи на листата на заштитено наследство на планетата. Лани на неа се најдоа италијанското оперско пеење, бабиците од Кипар, Германија и Словенија, како и номадското сточарство на алпските фармери од Швајцарија. 

Оваа година номинирани се околу 700 обичаи и практики, од кои дел се веќе разгледани и усвоени на 19-тата сесија на Меѓувладиниот комитет кој заседава во Асунксион, Парагвај, а која започна на 2-ри и ќе трае до 7-ми декември. Денес, 5.12. е изгласан заедничкиот македонско-турски предлог на листата да се најде македонската гајда односно турскиот тулум, кој бил поднесен пред две години. Заседанието и гласањето за оваа ставка можат да се видат на снимката тука (на 1 час и 50 мин). 

До сега се изгласани и живописните украински велигденски јајца „писанки“, чија традиција се бележи и пред христијанството. Јајцата, украсени со детални шеми и премачкани со восочна техника, се препознатливи низ светот како дел од украинската традиција. 

Како нематеријално културно наследство е признаено и јапонското саке – меко вино од ориз кое се користи не само за пиење во локалните кафеани „изакаји“, на свадби и други свечености, туку и за готвење, на пример во рецептот за јапонската супа – рамен. Основните состојки се ориз, вода, квасец и „коџи“ – оризова мувла која го разградува скробот во ферментирани шеќери. За едно саке да биде признаено како јапонско мора да биде изработено од ориз одгледан во Јапонија. 

Помеѓу останатите практики, на листата се додадени и естонското традиционално јадење од компир „мулги пудер“, како и босанската севдалинка, а списокот до крајот на заседанието се очекува да биде и поголем.

Заменик-министерката за транспорт, Калтрина Зеколи-Шаќири, истакна дека унапредувањето на локалната инфраструктура останува еден од клучните приоритети на Министерството за транспорт. Во рамките на состанокот на Работниот комитет, на кој учествуваа генералниот секретар, амбасадорот на Словачка и претставници на УНДП, заменик-министерката го нагласи значењето на стратешките инфраструктурни проекти кои помагаат во регионалното поврзување и ја подобруваат пристапноста на земјата кон европските и глобалните пазари.

Таа го издвои Коридорот 8 и 10 како приоритет, заедно со бројни други клучни проекти, кои се од суштинско значење за зголемување на ефикасноста на транспортот и одржливиот развој. „Овие проекти не само што ќе го подобрат квалитетот на животот за нашите граѓани, туку и ќе ја позиционираат Северна Македонија како транспортен јазол со стратешко значење во регионот“, изјави Зеколи-Шаќири. Состанокот служеше како платформа за размена на идеи и зајакнување на меѓународните партнерства за понатамошен развој на локалната инфраструктура.