Во вечерашното издание не поткастот „ВМРО-ДПМНЕ Зборува, пратеничка група“ гостуваше пратеникот Дејан Проданоски дискутираше на тема поврзана со законските регулативи за зајакнување на безбедноста во сообраќајот и за мерките кои се преземаат со цел намалување на сообраќајните несреќи. Притоа стави акцент и на своите размислување за тоа како да се подобри безбедноста во сообраќајот.

Проданоски наведе кои чекори можат да придонесат за смалување на бројот на сообраќајни прекршоци, со оглед на тоа што се регистрирани преку 19 илјади прекршоци во изминатите три години, но и за влијанието на законот и ригорозните мерки.

„Од она што слушнавме и од она што го знаеме, како пратеници и како граѓани, е дека навистина имаме и ригорозни закони кои влијаат врз подобрување на безбедноста во сообраќајот. И не е еден закон, туку неколку закони, Кривичниот закон, Законот за безбедност во патниот сообраќај и Законот за прекршоци, сите тие влијаат на некој начин да се подобри состојбата“, вели Проданоски.

Во поткастот тој наведе дека треба да биде казниво се што е поврзано со сообраќајните прекршоци и дека секоја неказнивост дава можност за повторување на прекршокот. Исто така истакна и дека токму имплементацијата на системот „Безбеден град“ како приоритет на МВР, ќе помогне во тоа да се подобри сообраќајната култура во државата.

„По воведувањето на системите на „Безбеден град“ во Скопје, тоа ќе се прошири на територијата на целата држава и од безбеден град Скопје и безбедни градови во Република Македонија, да станеме безбедна држава. Системите коишто се во најава да се воспостават, ќе направат јасна дистинкција ако сте направиле прекршок, мора да бидете санкционирани“, рече Проданоски.

Пратеникот Проданоски истакна кои фактори имаат влијание врз безбедноста, притоа наведувајќи дека се преземаат конкретни чекори со вложување во инфраструктурата, со осветлување на клучките и пешачките премини, исто така дека возачите треба да ги почитуваат зоните на смирен сообраќај, а во однос на образованието да се зголемат часовите на техничко образование.

„Неколку сегменти или неколку фактори се значајни за подобрување на безбедноста во сообраќајот и тоа е генералната безбедност, инфраструктурата и однесувањето на возачите. Во однос на безбедноста, ние почнавме со големи чекори напред, подобрувањето на инфраструктурата е еден од главните предуслови за безбедноста во сообраќајот. Јас доаѓам од Пелагонија, од општина Прилеп, каде што во најава е една делница од експресниот пат Градско-Прилеп, а се очекува до крајот на март да се пушти и комплетно дваесет и осум километарско подобрување на патната инфраструктура“, истакна Проданоски.

Недостигот на морал и одговорност во судскиот систем го прават овој проблем уште посложен, изјави вечерва потпретседателот на Владата и министер за транспорт и врски, Александар Николоски на Тема на денот на Сител телевизија.

Николоски нагласи дека иако е потребно да се решаваат многу проекти, без правда во државата, граѓаните нема да се чувствуваат безбедно. Според Николоски, иницијативата за распуштање на Судскиот и Обвинителскиот совет е само првиот чекор кон подобрување на ситуацијата, а целта е да се врати довербата во судството и да се подобри правдата во земјата.

„Во моментов судството е најслабиот дел од општеството. Ние можеме цела Македонија да ја изградиме, да имаме десетици проекти, но луѓето бараат правда и очајно ја бараат правдата. Тие не прават разлика помеѓу властите, затоа што извршната власт, во која што сме ние, и судската се одвоени, но затоа што нас не не избираат на избори, одма бараат решение. Самото тоа што довербата е 2%, тоа е статистичка грешка, многу кажува. Тоа се луѓе кои што исто се занимаваат со јавен живот. Јас да би имал 2% поддршка, би ми било срам на улица да излезам, а камоли да се занимавам со јавна работа“, истакна Николоски.

Тој нагласи дека членовите на Судскиот совет треба да поднесат оставка, бидејќи се избрани од Собранието, а поддршката за нив доаѓа од коалицијата СДСМ-ДУИ.

„Во моментот кога ние ја поднесовме оваа интерпелација, очекував членовите на Судскиот совет да поднесат оставка, затоа што тие се бирани од Собранието. Ние не поднесовме првиот ден по формирање на владата, оставивме да видиме како ќе работат. Тие кои што ги поддржуваат, тоа е коалицијата СДСМ-ДУИ“, нагласи Николоски.

Според Николоски, тоа што не поднеле оставки покажува дека членовите на Судскиот совет немаат морал и одговорност кон јавноста.

Најголем проблем во судството, како што вели, е недостатокот на морал и односот кон јавноста, што ја прави ситуацијата неодржлива, а масовниот одлив на луѓе од Македонија е резултат на недостигот на правда.

Со оглд дека судството не ги исполнува своите задачи и состојбата е очајна, Николоски потенцира дека иницијативата на премиерот Мицкоски е важен чекор, бидејќи, како што рече, без правда луѓето нема да се чувствуваат безбедно во земјата.

Денеска во Неготино започна маршот „Стоп за сообраќајното насилство“. Истиот беше предводен од другарките на 22 годишната Фросина Кулакова од Неготино која на 29 јануари го загуби животот откако беше прегазена на пешачки премин на булеварот „Партизански Одреди од 20 годишниот Васил Јованов.

На протестот се обрати и сестрата на Фросина, Росица Кулакова која им се заблагодари на граѓаните за нивното присуство во голем број и за поддршката.

-Коренот на сите проблеми во општеството доаѓа од судскиот систем бидејќи тој има неприкосновена обврска да покаже и да докаже дека злоделата мора да бидат соодветно казнети. Бидејќи законодавецот предвидел многу поголеми казни од оние кои судот во пракса ги досудува. Дури тогаш секој од нас ќе знае и ќе размислува за последиците пред постапките. По историјата на девијатното односување на Васил, по тоа што не почитувал никаков авторитет а и самиот суд во пресудата заклучува дека изјавите му се манипулативни и има направено повеќе прекршоци претходно, него го прави исклучително опасен за нашето општество. Васил станува една темпирана бомба. Поради сето ова, доколку судијката му го продолжила притворот до правосилноста на одлуката, а по вчерашната одлука на Апелација тој само бил спроведен во затвор, мојата сестра Фросина денеска ќе беше жива. Затоа бараме одговорност и од судијката Даниела Алексовска Стојановска и од сите кои вмешале прсти во убиството на сестра ми. Правда за Фросина, рече Росица Кулакова.

Граѓаните се упатија кон гробот на Фросина, а нејзиниот татко Тодор Кулаков, се заблагодари на поддршката и порача дека борбата за правда ќе биде долга, но ќе се изборат.

На протестот, барајќи правда, дојдоа и блиски на претходно загинатите Михаела Стеваноска, Слободан Ангеловски, Ивица Цековски, Мите Танов и други, посакувајќи ова низ што минуваат, никому да не му се случи. Но, побараа и ревизија на сите сомнителни судски случаи.