Засилени контроли кај производителите со интегрирани А и Б дозволи, зголемена контрола во станиците на преглед на возилата, контрола на градежните активности и соработка со општините што мора преку Инспекторатот, да ги засилат контролите, се дел од мерките за намалување на загадувањето на воздухот, изјави Ане Лашкоска, заменик министер за животна средина, при денешниот престој во Прилеп.

Лашкоска нагласи дека пред околу два месеца се донесени сет краткорочни и долгорточни мерки во однос на загадувањето на воздухот. Краткорочните мерки, како што беше појаснето, ќе бидат во сила сѐ додека трае грејната сезона. Тие мерки, според кажаното, се изработени заедно со министерствата за внатрешни работи, за транспорт и за економија и труд, со министерствата за здравство и за социјала, како и со општините и со Градот Скопје, „зашто само заедно може да се бориме со овој проблем“.

-Дел од мерките се засилени контроли на оние индустриски објекти, производители кои имаат А и Б интегрирана дозвола. Во овој период на овие големи производители им се препорачува да го намалат производството, меѓутоа да не го згаснат целосно, зашто при повторно вклучување на производството се предизвикувало уште поголемо загадување, а и загубите ќе бидат многу големи, посочи Лашкоска.

Дел од мерките, додаде таа, е и зголемена контрола на станиците за контрола на автомобилите, бидејќи било утврдено дека еден од големите загадувачи се автомобилите, особено на дизел гориво.

– Има методи и апарати што може да ги мерат овие издувни гасови, така што и таму преземаме засилена контрола. Големо загадување има онаму, каде се вршат градежни активности, па презедовме мерки, а мора да се започне и со контрола. Забрането е во периодот од 7:30 до 18:30 часот да се носат градежни машини на градилиштата. Последниве денови увидовме дека, каде што има градежни активности, не се почитуваат ниту препорачаните мерки, ниту пак мерките за загревање. Забележуваме дека сопствениците на тие градежни објекти, за да се топлат работниците, во буриња палат сѐ и сешто и на тој начин се зголемува загадувањето, рече Лашкоска.

Со општините се бара поголема соработка. Една од препораките, како што беше посочено, е често миење на улиците во овој период на грејна сезона, оти еден од показателите бил дека прашината е голем загадувач.

Малите и средните фирми биле едни од поголемите загадувачи, а и таму веќе се започнале инспекциски контроли.

– Упатувам апел до општините да ги пуштат на терен општинските инспектори, особено во малите и средните претпријатија, зашто не само оние кои имаат А и Б интегрирана дозвола, туку и оние што имаат одобрени елаборати од Министерството за животна средина, како разните работилници, преку отпадниот материјал го користат за греење и на тој начин се зголемува загадувањето. Ако не се почитуваат мерките, залудно е што се донесени, смета таа.

Најголемиот проблем за загадувањето, како што беше нагласено, греењето, во овој момент не можело да биде целосно решено. Владата има долгорочен план, беше истакнато, направен за периодот 2024 до 2030 годинa, што предвидува постепена промена на системите на греење, прво во државните и во општинските институции.

– Во меѓувреме имаме проект што е во тек во соработка со Европската унија од компонентата ИПА 3. Преку тој проект во Скопје дониравме шест еколошки автобуси, предвидено е менување на системите за греење на 70 државни институции во неколку градови. Но, залудни се акционите планови ако немаме поддршка и од општините, од сите институции и од сите инволвирани страни, подвлече Лашкоска.

Според Лашкоска, во овој критичен период мора да се води сметка и за состојбите во сообраќајот во градовите. Предвидено било да се воведува посебен сообраќаен режим во сите општини.

Општините со МВР требало да договорат тешките товарни возила да не врват во центрите на градовите, туку да одат по обиколен пат во одреден период кога тие ќе оценат.

– Повторно упатувам апел заедно да се бориме против ова зло, додаде Лашкоска при денешниот престој во Прилеп на завршните работи на проект за урбанизација на канал.

Инаку, во земјава, мерни станици поставени од Министерството за животна средина и коишто релевантно го мерат нивото на загадувањето на воздухот, има 22, од нив, една е мобилна. Една од мерните станици е стационирана во кругот на прилепската општа болница.

Американската амбасадорка Анџела Агелер изјави дека е задоволна што поранешниот вицепремиер Артан Груби е на црната листа на САД. 

Таа во поткаст вели дека за случајот што тој е обележан од американските власти, доказите се на дофат на македонските власти, но како што рече, тие не се орган на прогонот. 

Доказите се тука, најголемиот дел од нив, не сите. Може да се отвори случај од она што е достапно тука и во регионот и тоа е она што ние како амбасада се надеваме дека ќе се случи, но исто така ние не сме орган на прогонот. Јас нема да му влезам никому дома, но се надевам дека ова поттикнува акција и  можам да кажам дека последните неколку имиња на црната листа навистина предизвикаа реакција, вели Агелер.

Таа вели дека нема поим каде се наоѓа Артан Груби, а на новинарска забелешка дека тој е во Албанија, Агелер рече „ако има една работа што во оваа земја се прави многу, многу добро, тоа е да се пуштаат гласини“.

Според неа, ирелевантно е каде е Артан Груби, но вели дека генерално гледано, луѓето не бегаат ако немаат што да кријат.

Оттука, она на што ние се надеваме, она што јас се надевам, е токму како што велите, одговорност – да ја преземеш одговорноста ако не си направил ништо погрешно. И ова важи за секој кој е ставен под санкции, односно за секој кој е под некаква судска постапка во оваа земја. Ако немаш што да криеш, тогаш врати се и докажи го тоа. Постои правен процес овде, и дел од тој процес започна со господинот Груби во врска со различни обвиненија што му се покренати. И, пак, ќе речам, ако нема што да крие… и знам дека многу се зборува за – и знам дека е така – дека има влијание во судството – тоа може да биде проблем, но луѓето во оваа земја сакаат да видат дека се води процес. Луѓето сакаат да разберат за каков процес станува збор и зошто одредени работи се прават. И најдобриот начин да се врати довербата на јавноста овде е да има отворен процес, а тоа значи дека некој што е обвинет за одредени дела треба да се врати и, како што велиме, да се соочи со последиците, рече таа.

Денес улиците на Битола беа сведоци на несекојдневна глетка – моторџии облечени како Дедо Мразовци, кои со насмевки, адреналин и празнична енергија ја разубавија „Зимска Приказна“.
Празничниот караван во кој учествуваа членовите на МК Конзули