Чаир добива нов современ фудбалски терен, кој ќе служи како помошно игралиште во рамки на стадионот на ФК Шкупи. Проектот беше официјално презентиран од првиот вицепремиер и министер за животна средина, Изет Меџити, заедно со заменик-министерката за спорт Сафие Садики, претседателот на ФФМ Масар Омерагиќ и градоначалникот на Чаир, Висар Ганиу.

Новата фудбалска површина ќе има димензии од 80 метри во должина и 50 метри во ширина, со заштитни корисници од по 3 метри на сите страни. Изградбата ќе се реализира според стандардите на ФИФА, со квалитетна вештачка трева, дренажен систем за одведување на атмосферските води, како и комплетно осветлување што овозможува користење и во вечерните часови.

„Овој инвестициски проект претставува конкретен чекор во подобрување на условите за тренинг и професионален развој. На младите љубители на фудбалот им отвараме нови можности за напредок и успех,“ истакна Меџити.

Проектот е дел од пошироката стратегија за унапредување на спортската инфраструктура и поддршка на младинскиот развој во урбаните средини.

Фудбалската федерација на Македонија (ФФМ) денеска официјално го започна процесот на измена на Статутот, во координација и тесна соработка со меѓународните фудбалски тела – ФИФА и УЕФА.

Работни групи составени од домашни и странски експерти веќе работат на првичната драфт верзија на новиот Статут, кој треба да донесе модерна, функционална и транспарентна организациска структура. Процесот се одвива согласно македонското законодавство и регулативите на ФИФА и УЕФА.

Од страна на УЕФА во процесот се вклучени Мариана Трандафир, Енио Боволента и Денис Бастари, додека ФИФА ја претставува Емили Дом.

Претседателот на ФФМ, Масар Омерагиќ, изјави дека ова е еден од најважните чекори за реформите што Федерацијата ги најави:

„По повеќе од 15 години, ќе добиеме нов статут, усогласен со современите стандарди и потреби. Нашата цел е да изградиме функционална и отчетна фудбалска организација на сите нивоа.“

Новиот статут се очекува да биде усвоен на почетокот на 2026 година и да го отвори патот за поголема вклученост на фудбалската заедница, транспарентност во управувањето и долгорочен развој на македонскиот фудбал.

Добрата форма на македонската фудбалска репрезентација резултираше со скок од пет позиции на најновата ранг-листа на ФИФА, каде што „црвено-жолтите“ сега се наоѓаат на 62. место.

Овој напредок доаѓа по серија позитивни настапи во изминатиот период, со што Македонија успеа да ги надмине селекциите на Албанија, Јордан, Грузија, Буркина Фасо и Обединетите Арапски Емирати. Формата и резултатите носат нова доза на оптимизам за продолжение на натпреварувачкиот циклус.

Следната шанса за дополнителен напредок ќе биде натпреварот против Лихтенштајн во рамки на квалификациите за Светското првенство, каде што избраниците на селекторот Благоја Милевски ќе се обидат да го продолжат позитивниот резултатски тренд.

На самиот врв на ранг-листата нема промени – Аргентина и понатаму е убедливо прва, пред Шпанија, Франција, Англија и Бразил.