Првиот вицепремиер и лидер на еден од столбовите на коалицијата ВЛЕН, Изет Меџити, денеска испрати силна политичка порака, нагласувајќи дека борбата за идеали и принципи останува главната движечка сила на неговиот политички ангажман. Во обраќањето до јавноста, Меџити ги осуди обидите за раздор во коалицијата, оценувајќи ги како производ на личен опортунизам и клиентелизам.

„Политичкиот ангажман без идеал е опортунизам. Таму каде што нема принципи, има клиентелизам“, истакна тој, алудирајќи на поединци и политичари од минатото кои, според него, се плашат од промената и дејствуваат исклучиво во интерес на тесни клиентелистички кругови.

Меџити го оцени минатогодишниот процес на промени како тешка, но неопходна борба против стари структури и интереси. Тој ја обвини „подземната мрежа“ и политичките кланови за обидот да го дестабилизираат ВЛЕН, но порача дека тие обиди не успеале.

„И покрај силниот притисок, ВЛЕН останува обединет околу идејата за промена. Сценариото за раздор пропадна – затоа што нè обединуваат духот, принципите и идеалите“, рече Меџити, додавајќи дека Алијансата за Албанците ќе излезе уште посилна од оваа криза.

Со јасна порака дека нема место за опортунисти во овој процес, тој ги повика сите кои веруваат во промената да се приклучат на движењето.

„Тука сме, посилни од пред една година. Имаме исправна намера и чиста волја. Да веруваш во принципи и да се бориш за да ги одбраниш – ДА – ВРЕДИ!“, заврши Меџити.

„Сметам дека излегувањето (н.з. од Владата) во овој момент, без јасен план, дава можност за индиректно рехабилитирање и ‘лечење’ на старите структури од ДУИ и нивните несмасни наративи, а тоа е чекор што јас не го делам, бидејќи верувам дека секој еден млад Албанец, интелектуалец, заслужува поразлична политичка опција“, напиша на Фејсбук поранешниот министер од редовите на Алијанса за Албанците, Азир Алиу

Поранешниот министер за информатичко општество и администрација од редовите на Алијанса за Албанците, Азир Алиу, денеска на Фејсбук објави дека останува во коалицијата ВЛЕН.

Алиу напиша оти смета дека Владата почнала пресметка со корупцијата и криминалот и го подигнала гласот против заробената држава на, како што вели, веќе познатите и корумпирани структури во ДУИ.

Верувам дека определбата за промени во општеството не се напушта при првата пречка, туку се гради со уште повеќе работа. Со голема почит кон претседателот на партијата и неговото право на политичка проценка, се чувствувам должен јавно да кажам дека ќе продолжам да бидам дел од процесот што го започнавме заедно во ВЛЕН и во оваа Влада! … Сметам дека излегувањето во овој момент, без јасен план, дава можност за индиректно рехабилитирање и ‘лечење’ на старите структури од ДУИ и нивните несмасни наративи, а тоа е чекор што јас не го делам, бидејќи верувам дека секој еден млад Албанец, интелектуалец, заслужува поразлична политичка опција“,напиша Алиу.

Вицепремиерот за добро владеење, пак, Арбен Фетаи, кој исто така доаѓа од Алијанса за Албанците, на Фејсбук објави фотографии од средба што денеска ја имал со косовскиот премиер Албин Курти пишувајќи дека идеалот за напредок и развој не познава граници.

На една од фотографиите се гледа и ексминистерот Азир Алиу.

„Утринава, заедно со неколку пријатели по идеал од Алијансата за Албанците, тргнавме кон Приштина, поминувајќи по автопатот ‘Арбен Џафери’, пат кој за нас не е само инфраструктура, туку симбол на нашата духовна и национална поврзаност. Таму во Приштина имавме братски разговор со нашиот пријател, Албин Курти. Она што денеска нè обединува, повеќе од кога било, е нашата заедничка визија и идеал за напредок и развој, идеал кој не познава граници, ниту пречки“,напиша Фетаи.

Инаку, пред два дена Арбен Таравари ја напушти Владата поднесувајќи си оставка од позицијата министер за здравство. Денеска во интервју за албанската телевизија МЦН тој појасни дека неговата Алијанса за Албанците ја напушти Владата и коалицијата ВЛЕН бидејќи не сакале да бидат само декор во власта.

Ние како Алијанса за Албанците не сме навикнати во Владата да бидеме само декорација. Затоа решивме да одиме во опозиција и да се вратиме кај граѓаните, да разговараме со нив, за да се подготвиме за локалните избори што треба да се одржат во октомври годинава. На пет месеци сме пред локалните избори и мислам дека партијата треба да се мобилизира бидејќи за нас е многу важно да извојуваме победа“,изјави Таравари.

Првиот вицепремиер, пак, Изет Меџити кој е еден од лидерите во коалицијата ВЛЕН, изјави дека Владата има стабилно мнозинство и по заминувањето на Арбен Таравари и дека во тек се преговори со пратеници од „Европскиот фронт“, кои се во опозиција, за нивно приклучување кон владејачкото мнозинство.

извор: 360stepeni.mk

Триесет и седумтте Центри за социјална работа во државава, најдоцна за еден месец ќе добијат физичко обезбедување од лиценирана компанија за таа дејност. Постапката за Јавна набавка, која неодамна ја објави ресорното Министерство, истекува неделава и со неа се бараат вкупно 60 обезбедувачи, најави заменик- министерот за социјална политика, демографија и млади, Ѓоко Велковски.

 „Се бараат 60 лиценци, 60 лица да бидат ангажирани постојано од страна на компанијата која што ќе ги обезбедува токму нашите објекти…За пет дена ќе ја имаме компанијата, нели во евалуација, а потоа го очекуваме и договорот, така што за месец дена од денеска, би имале финален договор самата компанија која што ќе биде избрана“, – изјави Ѓоко Велковски, заменик министер за социјална политика, демографија и млади.

Ваквиот забрзан след на одлуките на Министерството, доаѓа откако пред месец и половина во прилепскиот Центар за социјална работа, службеничка беше застрелана со пиштол од страна на извесен корисник од кого и претходно добивала закани. Според директорот на Центарот, кој и самиот беше мета на напаѓачот во немилиот настан, а кој за среќа заврши без жртви, последиците кај сите вработени се’ уште силно се чувстуваат, па физичкото обезбедување на овие установи, за жал, се наметнува како нужност, вели тој.

 „Јас сум убеден дека колку-толку ќе се чувствуваме побезбедно кога ќе знаеме дека на Приемно ќе имаме некој кој што ќе може да врши селекција на странките и ќе има овластувања кои што ние во моментов ги немаме, по однос на тоа да се види кој што носи, како носи. И претпоставувам дека ќе се допушта качување по канцеларии исклучиво со покани…Дел од колегите користеа и подлоготрајни боледувања, по препорака на психијатар, психолог или матичен лекар. Полека, полека се консолидираме, веќе сме заедно“, – рече Зоран Малковски, директор на МЦСР – Прилеп.

 Инаку, вооружениот напад во прилепскиот Центар се случи на 23 март, пред крајот на работното време, кога во канцеларијата од директорот се одвивала вистинска заложничка драма. Во инцидентот полесно беше повредена 36-годишната социјална работничка М.Ѓ., која со пиштол ја застрела 50-годишниот А.Ј, најверојатно незадоволен од претходно изречените мерки на Центарот при неговата бракоразводна парница, Притоа, тој испукал дури пет куршуми од оружјето за кое немал дозвола, а кај себе имал и нож. На 20-ти март, тој избегал од Психијатриската болница во Демир Хисар, за што Центарот пак, воопшто не бил информиран. Напаѓачот веднаш е лишен од слобода и против него покрената е соодветна Кривична пријава.