Албанскиот парламент го усвои предлог-законот за родова еднаквост со 77 гласа „за“ и 36 „против“, по бурни дебати и реакции од различни политички страни, објави агенцијата Anadolu.

Законот го дефинира родот како улоги и однесувања кои општеството ги смета за соодветни за жени и мажи и има за цел да обезбеди еднаквост во сите области на јавниот и приватниот живот. Според властите, законот гарантира еднаков третман без оглед на полот, преку заштита, еднакви можности за користење на права и услуги, учество и застапеност во општествениот живот.

Законот предизвика протести и критики, особено од опозициската Демократска партија, која тврди дека законот е „антинационален“ и го загрозува семејството и традицијата. Премиерот Еди Рама го оцени законот како „високо морален“ и во согласност со принципите на Европската унија за родова еднаквост и недискриминација.

Покрај ова, парламентот го одби предлогот за формирање истражна комисија за смена на претседателот Бајрам Бегај, по иницијатива на Демократската партија.

Владата на Словенија донесе пакет радикални мерки за јавна безбедност по смртта на 48-годишниот Алеш Шутар, кој беше брутално претепан од 21-годишен припадник на ромската заедница. Новиот закон, наречен „Шутаров закон“, му дава поголеми овластувања на полицијата и дозволува интервенции во социјалните права, со цел да се превенираат вакви насилства.

Законот предвидува дека насилните дела ќе се гонат по службена должност, наместо на барање на жртвата. Дечињата на малолетни мајки ќе бидат под надзор на Центарот за социјална заштита, а социјалната помош повеќе нема да биде заштитена од извршување. Мали кражби сега ќе се третираат како прекршоци, што ќе овозможи побрзо процесирање.

Дополнително, Владата активираше член 37 од Законот за одбрана, овозможувајќи на армијата да ги поддржува полицијата на границите. Војниците ќе помогнат во обезбедувањето на критични точки и ќе ја зајакнат кадарската присутност на полицијата.

Мерките вклучуваат и овластување на полицијата да влегува во домови или возила без судска наредба ако постои сомневање за оружје, повторно воведување на технички средства за препознавање регистарски таблички, како и можност за забрана на приближување и затворање на угостителски објекти до шест часа за лица кои нарушуваат јавен ред.

Најтешките казни за насилни дела се зголемуваат, а судовите ќе можат да користат докази прибавени на начин кој инаку би бил недозволен. Осомничените за најтешки дела можат да бидат притворени до три години без пресуда.

Социјалните служби ќе ја преземат привремената грижа над децата, а Центарот за социјална заштита ќе управува со детскиот додаток. Општините со ромски населби ќе мора да обезбедат најмалку 10% работни места за Ромите во јавниот сектор.

Нападот врз Алеш Шутар се случи на 25 октомври пред ноќен бар, каде осомничениот го претепал 48-годишникот кој дошол по синот поради закани од група Роми. Истражниот судија му одреди притвор на 21-годишниот осомничен, кој се соочува со казна од пет до 15 години затвор.

Во Хрватска, двајца малолетници предизвикаа вистински хаос кога украле автобус и го возеле низ островот, јави 24sata. Инцидентот се случил на 4 ноември, кога 17-годишник го одзел автобусот во Бол и го возел кон Супетар, удријајќи во сообраќајни знаци и предизвикувајќи штета на паркиран камион.

Сведоци за медиумите изјавиле дека автобусот возел без светла, опасно и непредвидливо, оддалечувајќи се од коловозот и создавајќи ризик за другите учесници во сообраќајот.

Кога пристигнале во Супетар, малолетниците го оставиле автобусот на пристаништето и се обиделе да фатат траект за Сплит, но полицијата брзо интервенирала и ги спречила.

Полицијата утврдила дека двајцата учесници се малолетници, а истрагата продолжува за да се утврдат сите последици од опасната авантура.