Утринава беше уапсен сега веќе поранешниот министер за здравство на Хрватска Вили Берош. Тимови на Канцеларија за сузбивање на корупцијата и организираниот криминал (УСКОК) влегле во неговата куќа во Загреб нешто пред 7 часот изутрина и започнале претрес. Европските обвинители соопштија дека тие покренале акција против Берош и уште седум лица заради криминално здружување, наведувајќи дека Берош примил мито.

Премиерот Андреј Пленковиќ го разреши Берош и свика прес-конференција, која започна нешто по 11 часот.

– Како што знаете, утринава беше уапсен поранешниот министер Вили Берош и уште две лица, во рамки на акција на УСКОК, за што ме информираше главниот државен обвинител. Не сум запознаен со деталите. Очигледно станува збор за коруптивни кривични дела. Она што сакам да го кажам во име на Владата е дека надлежните органи треба сè да истражат, изјави хрватскиот премиер.

– Како претседател на Владата, лично сум згрозен од идејата дека некој во здравствениот систем би ја користел својата положба за лично збогатување или за да му удоволува на некој друг. Станува збор за незаконско дејствување на министерот и некои други службеници во здравството. Тоа е особено чувствителен ресор и тема. Министерот Берош доби доверба од мене и од граѓаните да се грижи за здравството и да управува со ресурсите на законит начин, за да им се обезбедат најдобрите услуги на сите пациенти, додаде шефот на хрватската Влада.

Пленковиќ изјави дека ова може да се смета за чин на предавство.

– Ниту тој, ниту кој било друг, не доби мандат за злоупотреба на системот и извршување кривични дела. Иако ова е непријатен момент за Владата, целосно ја поддржуваме истрагата. За корупцијата нема место, без разлика за кого станува збор. Ако се докаже дека обвинувањата се точни, ова го доживувам како чин на предавство на личната доверба што ја имав во него овие пет години, откако му ја укажав честа да биде министер. Се надевам дека овој случај ќе послужи за дополнителен ангажман во борбата против корупцијата, рече Пленковиќ.

Тој одби да ги коментира деталите од случајот.

„Знам само она што прочитав. Истражните активности се тајни. Ние не сме полиција, ниту Државното обвинителство, па немаме сознанија за деталите од случајот. Од друга страна, ако надлежните органи процениле дека доказите, индициите и некои изјави се такви што довеле до апсење на министерот, тогаш ситуацијата сигурно е сериозна и укажува најмалку на сомнение за кривични дела.“

„Го разрешив министерот Берош веднаш штом дознав за какви кривични дела е осомничен,“ додаде премиерот. Тој демантираше дека ова има врска со Европската јавна обвинителка Лаура Ковеси и состанокот што го одржаа.

Пленковиќ истакна дека последниот контакт со Берош бил вчера, кога министерот го информирал за резултатите од разговорите со синдикатите.

Во однос на именувањето на нов министер, премиерот рече: Дајте време. Не си легнав синоќа со мисла дека денеска ќе бидам пред вас на прес-конференција и дека ќе имам трет коалициски состанок оваа недела.

Министерството за правда на Република Македонија денеска организира тркалезна маса за потребата од измени и дополнувања на Законот за Судскиот совет. 

Настанот, кој се одржува во Клубот на пратеници во Скопје со почеток во 10 часот, е дел од најавените реформи во правосудството на новата Влада.

Министерот за правда, Игор Филков, вчера истакна дека измените во Судскиот совет и Советот на јавни обвинители се клучни за напредокот кон ЕУ. 

– Почнуваме со стручните дебати за нацрт измените и дополнувањата на Законот за судскиот совет подготвен од страна на работната група, формирана од страна на Министерството за правда. Ова ќе биде еден од неколкуте настани кои што ќе следат периодов. Планирано е некаде до крајот на декември да го завршиме процесот, што значи дека ќе имаме една дебата неделно. Очекувањата се големи. Заклучоците и препораките од тркалезната маса ќе бидат основа за понатамошно подобрување на текстот на измените и дополнувањата на законот за судскиот совет, рече министерот Филков на вчерашната дебата „Платформа: 100% посветени за тебе“ на тема „Фокус на правдата, безбедноста и одбраната“.

Во однос на најавените консултации за реформи на Судскиот и Јавно обвинителскиот совет, од Владата за МИА претходно посочија дека реформите вo правосудниот систем од предизборно ветување станаа дел од владината програма 2024-2028 година, конкретно во глава II-Фонд против корупција.

– Владата се залага за системски решенија, за трансформирање на правосудните органи во вистински, транспарентни, одговорни и ефикасни институции. Сериозно сме посветени и остануваме на идејата за носење на решенија кои ќе бидат темел на едно нормално демократско општествено. Со цел донесување на одржливо решение повикавме на расправа и побаравме инклузивност, за што до денес немаме таква состојба на повидок. Па оттука сосема логично е прашањето дали од распуштањето на овие институции има многумина загрижени субјекти? Важно е да се знае дека доаѓа време на промени и шанса за професионалните и способни кадри, посочија од Канцеларијата на портпаролот на Владата.

Воведни обраќања на денешниот настан ќе има министерот за правда, Игор Филков и Диетер Шиндлауер, раководител на тим на проектот „Поддршка на ЕУ за владеење на правото“.

Потоа, академик Владо Камбовски ќе одржи презентација на процесот на изработка на нацрт измените и дополнувањата на Законот за судски совет, по што ќе следува дискусија.

На дневниот ред од настанот се и дискусии за услови и постапка за избор на членовите на Судскиот совет, мандат и одговорност на членовите на Судскиот совет, постапка за утврдување дисциплинска одговорност на судија вклучувајќи и постапка по жалба и останати проблеми и предизвици кои треба да се адресираат во Законот за судскиот совет.

Целта на настанот е поттикнување стручна расправа за содржината на нацрт измените и дополнувањата на Законот за Судскиот совет на Република Македонија, подготвени од страна на работна група во рамки на Министерството за правда. 

Тркалезната маса е првата од неколкуте настани за консултирање на стручната јавност кои Министерството за правда планира да ги организира со цел да се обезбеди транспарентен и инклузивен процес кој ќе придонесе кон унапредување на законската рамка која го уредува работењето на Судскиот совет.

Заклучоците и препораките од тркалезната маса ќе бидат основа за понатамошно подобрување на текстот на измените и дополнувањата на Законот за судскиот совет.

Настанот, како што информираат од МП, е во соработка и со поддршка од проектот ,,Поддршка на ЕУ за владеење на правото“.

На COP29 во Дубаи, министерката за енергетика, Сања Божиновска, ја истакна поддршката на Македонија за иницијативите за зелени енергетски коридори и иновативно складирање на енергија. Таа ја потенцираше важноста од регионална и глобална соработка за забрзување на енергетската транзиција и посочи дека земјата се стреми кон одржлив економски раст преку обновливи извори.

„Ова е можност да покажеме дека Македонија е подготвена за зелена иднина,“ изјави Божиновска, нагласувајќи го националниот ангажман во борбата против климатските промени.