Јавниот долг, вели министерката за финансии, во многу голема мера зависи од тоа колку останатите институции, акционерски друштва и т.н. ќе повлечат од веќе договорени кредити. 

Висината на јавниот долг, согласно последните пресметки велат дека на крајот на 2024 година ќе биде 62,7% од БДП, изјави министерката за финансии Гордана Димитриеска Кочоска.

Јавниот долг, нагласи Димитриеска Кочоска во многу голема мера зависи од тоа колку останатите институции, акционерски друштва и т.н. ќе повлечат од веќе договорени кредити.

-Ако не ги повлечат, може нема да биде ниту 62,7%. Тоа е проекција на Министерството за финансии, под претпоставка дека реализацијата на кредитите ќе оди така како што е договорено – изјави Димитриеска Кочоска, одговарајќи на новинарски прашања по отворањето на настанот „Фискалната политика на крстопат: Патот кон стабилност и одржливи јавни финансии“, во организација на Фискалниот Совет и Finance Think.

Прашана што ќе направи Министерството за финансии околу висината на јавниот долг, Димитриеска Кочоска, рече дека веќе работат најпрво на тоа да се види колкави се обврските од сите институции.

– Имаше заклучок од Влада, секоја од институциите, по заклучок од Влада, треба да достави информација колкави се обврските. Таму каде што имаме неусогласености, ги враќаме повторно кај институциите да ги усогласат и пријават обврските. Во меѓувреме како министер за финансии формирав неколку вонредни ревизии во одредени институции, кои што треба да ни потврдат, како внатрешна ревизија, дека навистина обврските кои што ги пријавуваат се такви, затоа што несоодветствуваат со коментарите кои што ги даваат вработените таму. Значи ревизорите ќе го констатираат тоа – изјави Димитриеска Кочоска. 

Со неверување ја следевме собраниската дебата на пратенички прашања во која повторно тема беа игрите на среќа. ДУИ праша зошто се уште нема ништо од најавите за затворање на казината, ВЛЕН одговори дека Владата има објавено војна на овој бизнис и обзнани дека до Нова Година ќе има нов, поригорозен Закон за игри на среќа.

Најмалку 10 илјади вработени во секторот игри на среќа и нивните семејства од вчера се во ново исчекување. Најмалку 35 илјади луѓе стануваат потенцијални нови кандидати за иселеници во западните земји. На закуподавачите на легалните објекти за игри на среќа им стигна најава дека нивните деловни простории може набрзо да зјаат празни. На банките кои дале кредити на вработените или на организаторите на игри на среќа, им се запали алармот. Да активираат банкарски гаранции, хипотеки, други заложни права.

Ваквата неодговорна политичка војна предизвикува економско-социјален земјотрес! Затоа, ние како Здружение на вработени во секторот игри на среќа „САКАМ ДА РАБОТАМ“ имаме прашања до политичките партии ДУИ и ВЛЕН:

Дали знаат дека причината поради која во Албанија беше прекината забраната за игрите на среќа е дека таму никнувале играчници на црно и цветала дивата економија? Дали знаат колку играчи од Косово дневно доаѓаат да играат во Македонија? Зошто сакаат да ја вратат Македонија во 1990 година, кога имаше покер апарати на скриени места во кафулињата, игри со ќибритчиња на „Камен Мост“ и диви играчници на секое ќоше без државна контрола? Дали тогаш младината не беше под поголем ризик? Дали можеби причината за ваквото нерационално однесување кон игрите на среќа е затоа што во овој сектор работат доминантно етнички Македонци? Зарем во 21 век треба вакви меѓуетнички дилеми да поставуваме?

Кога се зборува за „војна со овој бизнис“ треба да се земе предвид дека станува збор за најголемиот приватен работодавач во државата, економски сектор кој секоја година го полни Буџетот со минимум 280 милиони евра. Кога веќе се најавува нов Закон до Нова Година, треба како Здружение да бидеме вклучени во процесот на подготовка со активни предлози за обезбедување посилни гаранции за грижите на општеството, а не да бидеме цел на дневно политичка пресметка на политичките партии.

Нека ви е честит и вековит Денот на Албанската Азбука!

Здружение на вработени во сектор игри на среќа „САКАМ ДА РАБОТАМ“

Складирањето на електрична енергија со батерии е од клучно значење за иднината на енергетскиот сектор во Македонија, особено во контекст на зголемувањето на обновливите извори на енергија. Како што земјата преминува кон поголемо учество на обновливите извори на енергија, постои потреба за ефикасни решенија кои ќе обезбедат континуитет во снабдувањето со електрична енергија. 

Батериските системи играат важна улога во управувањето со нестабилноста на овие извори, овозможувајќи чување на вишокот енергија за употреба во периоди на недостаток. Владата на Република Северна Македонија го смета секторот за енергетика за значаен во поглед на развојот на државата и има најави за развој на инфраструктурата за складирање на електрична енергија. Во Министерството за енергетика, рударство и минерални суровини се изготвуваат законски можности кои ќе овозможат батериски системи за складирање на електрична енергија, а според добро упатени извори, во рамки на Царинската управа се разгледува опцијата и за намалување на тарифите за увоз на батерии, што би можело да поттикне инвестициски проекти во овој сегмент. 

Инвестицијата на Акуо Енерџи во соларниот парк во Штип е пример за проекти кои ќе имаат корист од вложувањето во батериски системи. Со планиран капацитет од 400 MW, овој проект ќе овозможи производството на електрична енергија за околу 94 000 домаќинства и ќе придонесе за намалување на зависноста од увоз на електрична енергија. Успешната реализација на овој проект би можела да создаде нови работни места и да ја стимулира економија во источниот регион. 

Значајно е што инсталирањето на батериски системи не само што ќе ја подобри ефикасноста на постоечките обновливи извори, туку и ќе привлече нови инвестиции во енергетскиот сектор. Овие системи ќе обезбедат стабилност и сигурност во снабдувањето со електрична енергија, што е од клучно значење за економскиот развој на Македонија. Имајќи ги во предвид најновите трендови во енергетиката, Македонија е на пат да стане пример за успешна транзиција кон зелена енергија во која батериските системи за складирање сигурно ќе имаат важен удел.