Собраниската делегација, предводена од претседателот Африм Гаши и пратеници од Собранието, кои престојуваа во официјална посета на шведскиот парламент, синоќа не можеше да се врати назад во Скопје поради фактот дека владниот авион Learjet 60 не бил безбеден за враќање. Информацијата ја пренесе порталот Zoom.mk. 

Ова не е прв случај кога владниот авион, кој веќе е стар над 20 години, не е во состојба да лета поради безбедносни причини. Во неколку наврати, експертите укажуваат на фактот дека авионот е престар и дека не одговара на новите трендови и стандарди во авијацијата. Но, и покрај ваквите предупредувања, властите досега не презедоа иницијатива за набавка на нов владин авион.

Министерството за енергетика, рударство и минерални суровини и Универзитетот „Гоце Делчев“ – Штип, денес потпишаа Меморандум за соработка со кој се отвораат нови можности за едукација и развој на кадарот во секторот за рударство, енергетика и минерални суровини.

Потписници на меморандумот се министерката за енергетика, рударство и минерални суровини Сања Божиновска и ректорот на Универзитетот „Гоце Делчев“ – Штип, Проф. д-р Дејан Мираковски.

Со оглед на тоа што секторот за рударство и минерални суровини во Македонија се соочува со сериозен недостиг на стручен кадар, оваа соработка е значајна за брза подготовка на едуцирани млади професионалци. Практикантската работа, стручната експертиза и можноста за директен пренос на знаење ќе обезбедат студентите да станат подготвени и високо квалификувани кадри.

„Соработката со еден од најреномираните универзитети во земјата е чекор кон обезбедување сигурна иднина во енергетиката и рударството. Со овој меморандум, вложуваме во едукација, иновации и нова генерација стручњаци,“ изјави министерката Божиновска по потпишувањето.

Ректорот, проф. д-р Мираковски, додаде дека Универзитетот ќе вложи максимални напори во создавање кадар кој ќе одговори на предизвиците на оваа значајна индустрија, со посебен акцент на примената на нови технологии.

Особено значајна е можноста за студентите да се вклучат во креирањето на јавни политики преку изработка на магистерски и докторски тези на теми релевантни за развојот на енергетиката и рударството.

„Нашите студенти имаат шанса да стекнат уникатно искуство и да придонесат за подобра иднина во индустријата која е мотор на економскиот развој,“ истакна проф. д-р Мираковски.

Меморандумот предвидува заедничко унапредување на законската регулатива во областа на енергетиката, рударството и минералните суровини, апликација за проекти кои ќе овозможат развој на нови технологии, како и организирање на практикантска работа за студентите.

Со овој меморандум, државата испраќа порака дека инвестирањето во образованието е основата за стабилен и одржлив развој на секторите кои се од витално значење за Македонија.

Семејствата во социјален ризик кои живеат во објектот на Старата касарна во Кочани ќе имаат по 100 киловатчасови електрична енергија месечно што ќе им бидат платени од општинскиот буџет. Потрошената количина над овој износ ќе мора сами да ја плаќаат или ќе бидат исклучени од електричната мрежа.

Одлуката за покривање на дел од трошоците за струја на 18 семејства едногласно ја донесе Советот на Општина Кочани на денешната седница, по предлог на советникот Аки Акиов. Притоа, беше заклучено одлуката да важи до трајно решавање на проблемот со домувањето на овие граѓани, кои главно се со ромска етничка припадност.

„Општината формираше комисија која направи попис на граѓаните кои живеат во Старата касарна, при што е утврдено дека се сместени околу 90 лица, од кои најголем број се малолетници. Со одлуката што ја донесе Советот, најдоцна до утре тие повторно ќе бидат приклучени на електричната мрежа. Одлуката за покривање на дел од трошоците за струја за нив од Буџетот на Општината ќе важи сѐ до вселувањето во таканаречените типски куќички, а што треба да почнат да се градат оваа пролет“, истакна советникот Акиов.

Семејствата во Старата касарна, што се наоѓа во централното подрачје на Кочани, живеат во супстандардни услови над две децении, а покрај електричната енергија, основен проблем им е снабдувањето со вода за пиење и недостигот од канализациски одвод.

Пред неколку години од државниот буџет беа обезбедени средства за изградба на објекти за нивно сместување на друга локација, но по реакција на месното население проектот беше запрен.