Откако Бугарија влезе во Шенген зоната од 1 јануари, српските туристи можно е летоска да ја избегнуваат Македонија, бидејќи времето ќе им биде „скратено“ за една граница.

Српските медиуми проверуваат како тоа ќе изгледа во пракса и дали повеќе патници ќе се упатат кон српско-бугарската граница Градина.

Земјите-членки на Европската унија одлучија да ја укинат контролата на луѓето на внатрешните копнени граници со и меѓу Бугарија и Романија од 1 јануари 2025 година, така што оваа одлука ќе влијае и на патувањето во Грција. Бугарија стана членка на Шенген зоната на која ѝ припаѓа Грција, што значи дека се укинуваат граничните контроли меѓу двете земји.

Затоа, ова лето секој што ќе реши да патува во Грција преку Бугарија би требало да има пократко, полесно патување со помалку гужви, особено во шпицот на сезоната.

Истражувањето на неколку српски портали покажа дека оваа опција вреди да се разгледа. Анкетите покажале дека 37 отсто од испитаниците изјавиле дека летово би патувале преку Бугарија, додека 18 отсто рекле дека тоа ќе зависи од метежот на границата. Оние кои не сакале да поминат низ оваа земја биле 34 отсто, додека 11 отсто одговориле дека воопшто нема да поминат низ Бугарија.

Туристичките автобуси нема да ги менуваат линиите и до Грција ќе патуваат по познатата рута преку Македонија, но таа опција  останува за оние кои до море патуваат со сопствен превоз.

Како причина, тур-операторите наведуваат дека патници од Ниш, Врање и од Лесковац, нема да ја менуваат рутата.

Српските туристи кои ќе ги изберат дестинациите како што се Тасос, Кавала и евентуално Неа Врасна, во пракса би било подобро да возат преку Бугарија, во однос на километрите, како и дека ќе има една граница помалку.

Проблемот во летните месеци е што граничниот премин Градина е доста фреквентен.

– Таа граница е позафатена од граничните премини Табановце и Богородица, има огромни гужви. Во пракса мислам дека нема да донесе ништо. Сè уште е побрзо да се оди преку Македонија. Ако одиме преку Бугарија, ќе трае исто толку бидејќи 120 километри на таа вкупна траса не се автопатишта, а горивото е поевтино во Македонија – велат тур-операторите.

– Иако рутата е нешто пократка и нема да има граница меѓу Грција и Бугарија, ние ќе ја користиме рутата преку Македонија бидејќи нашите искуства со бугарската граница не се големи во однос на брзината на минување. Ова го видовме благодарение на нашите летни одмори во Турција. Затоа веруваме дека доколку оваа граница дополнително се оптоварува со поголем број автобуси до Грција, нема да има заштеда на време – велат од друга српска туристичка агенција.

Проблемот со граничниот премин Градина за време на летото е што се создаваат огромни гужви од големиот број турски граѓани кои престојуваат во ЕУ кои преку оваа рута патуваат за Турција. Така, чекањето е често трае неколку часа.

„Патувањето ќе биде поедноставно и можеби побрзо ако летувате на Атос (трет крак на Халкидики) или на островот Тасос и регионот Стримоникос (Ставрос, Неа Врасна, Аспровалта, Неа Рода, Олимпијада, островот Амулијани). Додека големо прашање е дали е погодно за престој во Ситонија, а особено во Касандра, бидејќи километражата е многу поголема, а патиштате не се најдобри“, велат туристичките агенции.

– Значаен дел од нашите туристи во изминатиот период престојуваа една ноќ во Македонија на некои дестинации како Дојран, Охрид и слично. Во секој случај можно е оваа одлука да биде мотив за повеќе наши туристи кои ќе поминат нивните лета во Грција – додаваат туристичките оператори.

До морето водат две рути 

Ако одите со сопствен автомобил, постојат две главни рути по кои можете да одите до Грција (може да одите и преку Албанија, но исклучително ретко се користи) – преку Македонија и преку Бугарија.

При изборот, луѓето обично одлучуваат врз основа на нивната почетна точка, односно градот од кој го започнуваат своето патување, но и самата дестинација во Грција. Огромното мнозинство ја избира рутата преку Македонија, со исклучок на туристите од источна Србија или оние кои можеби летуваат на Тасос, Аспровалта или Ставрос. Сепак, можеби една граница помалку и гужвите на граничните премини ќе влијаат на изборот на рута во оваа година.

Ако одите од Белград до Солун, патот низ Македонија е пократок за нешто повеќе од 40 километри и може да се каже дека е поквалитетен затоа што сѐ е автопат, освен една мала делница во Грција, каде се вози по широки главни патишта.

Кога планирате патување, треба да знаете дека Србија, Македонија, Бугарија и Грција не се во иста временска зона. Во Србија и Македонија е исто време, но Бугарија и Грција се еден час понапред. Значи, кога е тука 12 часот, во Бугарија и Грција е 13 часот.

Останува само да се почека спроведувањето на оваа одлука и да се види по која рута ќе се движат туристите од Србија преку Грција.

Извор: plusinfo.mk

Необичен инцидент се случил денеска на аеродромот „Никола Тесла“ во Белград, кога чувар по грешка пуштил на пистата возило управувано од С.С., јавува Блиц.

Медиумите додаваат дека возачот на тој автомобил откако „дивеел“ на пистата побегнал од полицијата до границата со Босна и Херцеговина, но на крајот бил уапсен.

По тој повод контактиравме со аеродромот за да дознаеме повеќе детали за случајот.

Соопштение на аеродромот „Никола Тесла“

„Београдскиот аеродром сериозно ја сфаќа ситуацијата и веднаш се преземени превентивни мерки. Според проценката на надлежните, ќе се изврши дополнителна контрола на дел од аеродромот што може привремено да влијае на распоредот на летови.

Компанијата целосно соработува со властите за да се утврдат околностите и да се преземат дополнителни корективни активности за подобрување.

Додека истрагата е во тек, компанијата од белградскиот аеродром не може да даде повеќе детали.

Компанијата на аеродромот во Белград останува посветена на обезбедување соодветно ниво на безбедност и сигурност во воздушниот сообраќај заедно со сите релевантни чинители“, се вели во соопштението.

Сега веќе поранешниот американски претседател Џо Бајден во понеделникот превентивно помилувал пет члена од неговото семејство, неколку минути пред да му ги предаде должностите на Доналд Трамп, велејќи дека сака да ги спречи да бидат цел на „неосновани и политички мотивирани истраги“

Меѓу помилуваните се и неговите двајца браќа Џејмс и Френсис. На списокот се и Сара, сопругата на Џејмс Бајден, сестрата на Бајден, Валери и нејзиниот сопруг Џон.

Помилувањата се однесуваат на случај кога се појавија приватни чекови од уплата на Џејмс Бајден на Џо Бајден во износ од 200.000 долари. Претходно беше објавено дека во 2018 година, Џејмс Бајден добил 600.000 долари како заем од „Americore“, банкротираниот оператор на рурална болница. Според документите за стечајниот суд, Џејмс Бајден ги добил овие заеми „врз основа на тврдењата дека неговото презиме „Бајден“ може да „отвори врати“ и дека може да добие голема инвестиција од Блискиот исток врз основа на неговите политички врски.

На 1 март 2018 година, „Americore“ примил заем од 200.000 американски долари на личната банкарска сметка на Џејмс и Сара Бајден, но не на нивната деловна банкарска сметка. Истиот ден, Џејмс Бајден му напишал на Џо Бајден чек од 200.000 долари од истата лична банкарска сметка.

Документот што беше објавен ги покрана за тоа како сега веќе поанешниот претседател Бајден лично имал полза од заматенот влијание на неговото семејство кое тргува со неговото име и нивниот пристап до него. Банкарските записи добиени од Комитетот за надзор и одговорност на Претставничкиот дом открија директна исплата од 200.000 долари од Џејмс и Сара Бајден до Џо Бајден во форма на личен чек.

Џејмс Бајден му го напишал овој чек на Џо Бајден како „отплата на заемот“. „Americore“, кој во тој период се соочувал со голема финансиска криза по која банкротираше, му позајмил пари на Џејмс Бајден кој потоа му ги препратил на Џо Бајден, тврдат медиумите наклонети на републиканците.

Притоа се напоменува дека дури и доколку станувало за личен исплата на заемот, сè уште е проблематична способноста на Џо Бајден да го поврати заемот на неговиот брат што зависело од успехот на сомнителните финансиски зделки на неговото семејство. Се апострофира дека е непознато дали Џо Бајден знаел дека истиот ден кога Џејмс Бајден му напишал чек од 200.000 долари, Џејмс Бајден штотуку добил заем за точно иста сума од деловни зделки со компанија која била во финансиска дубиоза и пропаѓала?

Бајден, исто така, ја ублажи доживотната казна на индискиот активист Леонард Пелтиер, кој помина речиси пет децении во федерален затвор за убиствата на двајца агенти на Федеалното биро за истраги (FBI) во 1975 година.

Однапред помилувани и првиот доктор Фаучи и генералот Мили

Претходно во понеделникот беше објавено дека Бајден, само неколку часа пред да си замине од Белата куќа „превентивно“ помилувал голем број избрани функционери и државни службеници, барајќи да ги заштити од наводна „можна одмазда“ на Доналд Трамп.

Откако неговиот републикански наследник порача дека ќе им возврати поради саботирањето на неговите политички одлуки и политичко-судскиот прогон во изминатите четири години, Бајден одлучи да ги „заштити луѓето на црната листа на Трамп од неоправдани и политички мотивирани правни дејствија“.

Меѓу нив се поранешниот шеф на Здружениот генералштаб, генерал Марк Мили, поранешниот архитект на стратегијата за ковид-19 на администрацијата на Бајден, Ентони Фаучи, и луѓе кои учествуваа во комисијата задолжена за истрага за упадот на Капитол на 6 јануари 2021 година, како како и полициски службеници кои дадоа искази пред истата комисија.

„Верувам во владеењето на правото и уверен сум дека силата на нашиот судски систем на крајот ќе надвладее над политичките дебати. Но, ние живееме во исклучителни околности и не можам со чиста совест да сторам ништо. Вознемирувачки е тоа што јавните службеници беа изложени на закани и заплашувања поради верно извршување на нивните должности. На некои дури им се закануваа и правна постапка“, наведе Џо Бајден, кој потоа напладне по локално време му ја предаде власта на својот главен републикански ривал.

Случајот Хантер Бајден
На почетокот од декември Белата куќа ја појаснуваше одлуката на претседателот Џо Бајден да го помилува неговиот син Хантер, велејќи дека претседателот верува дека неговите политички противници ќе продолжат да го прогонуваат неговиот син.

Бајден ланскиот јуни тврдеше дека нема да го помилува својот син. Во интервју за телевизијата ABC News, тој одговори со „да“ на прашањето дали ја отфрла можноста за помилување на Хантер, а во декември Белата куќа одби да елаборира зошто и како Бајден се предомислил.

Хантер Бајден се изјасни за виновен за федералните даночни обвиненија во септември во федералниот суд во Лос Анџелес и требаше да биде осуден на 16-ти декември од судија назначен од новоизбраниот републикански претседател Доналд Трамп. Во јуни, поротата го прогласи за виновен за давање лажни изјави при проверка на потеклото на оружјето. А за тие обвиненија требаше да биде осуден во декември.

Бајден на почетокот од декември тврдеше дека неговиот син наводно бил „селективно гонет и третиран поинаку од другите во слични ситуации“, а неколку часа подоцна адвокатот на Хантер Бајден поднесе барање за отфрлање на обвинението.

„Целосното и безусловно помилување на претседателот „бара отфрлање на обвинението против“ Хантер Бајден, напиша тогаш адвокатот во поднесоците поврзани со случаите со оружје и даноци.

„Дали помилувањето на Џо за Хантер ги вклучува и заложниците Ј-6, кои се затворени со години? Таква злоупотреба и погрешна правда“, реплицираше тогаш Трамп на својата страница Truth Social, осврнувајќи се на осудените за упадот на приврзаниците на републиканскиот претседател на 6 јануари 2021 година, кои и денес тврдат дека тие избори се украдени во полза на Бајден.

„Џо Бајден лажеше од почеток до крај за активностите за коруптивно влијание на неговото семејство“, рече во декември пратеникот Џејмс Комер, претседател на Комитетот за надзор и одговорност на Претставничкиот дом.

„Јасно е Хантер беше третиран поинаку. Обвиненијата во неговите случаи дојдоа само откако неколку мои политички противници во Конгресот ги поттикнаа да ме нападнат и да се спротивстават на мојот избор. Во обид да го скршат Хантер, тие се обидоа да ме скршат – и нема причина да се верува дека ќе застанат тука. Доста е“, тврдеше Бајден во обидот да ја објасни одлуката за полмилувањето на неговиот син.

Хантер Бајден се соочуваше со повеќе кривични пријави, меѓу кои и за неплаќање на најмалку 1,4 милиони долари даноци, во периодот додека трошел милиони на раскошен и контроверзен живот на работ од криминалот, барем според досега познатите во јавноста поединости. Министерството за правосудство уште лани соопшти дека истрагата е во тек, а доколку биде прогласен виновен по обвиненијата, му се заканува затворска казна до 17 години. Обвинет е дека од 2016 до 2019 година не платил најмалку 1,4 милиони дилари сојузни даноци, додека истовремено трошел милиони долари на екстравагантниот животен стил.

Хантер Бајден е честа медиумска тема поради неговите зависноста од наркотици и алкохол, поврзаност со проституција и педофилски кругови, како и ескцесни однесувања, истекување фотографии на кои е гол или консумира дроги, а во фокусот е неговиот скап ангажман во украинската енергетска компанија „Bursima“, иако нема никакви познавања и допирни точки со енергетиката, во периодот додека неговиот татко беше потпретседател на САД и кога во Киев е сменет државниот обвинител кој ја истражувал компанијата за финансиски криминали.

Хантер Бајден, регистриран наркозависник и алкохоличар, осомничен за трговии со дроги, посредник во проституција, американските мејнстрим медиуми го претставуваат како „лобист, адвокат, инвестициски банкар и уметник“, иако е проблематично неговото образование за занимавање со тие дејности. Така, во контроверзната украинска енергетска компанија „Bursima“ – истражувана во Киев за корупција на високо ниво по превратот од 2014 година со поддршка на тогашната администрација во Вашингтон – за месечна надокнада од 83.000 долари бил дел од управниот одбор, иако нема никакави познавања од дејноста.

Во октомври 2020 година весникот The New York Post објави мејлови откриени во сервисираниот лаптоп до Хантер Бајден, во коишто се споменува дека тој го застапувал својот такто, додека Џо Бајден беше потпретседател на САД во мандатот на претседателот Барак Обама, пред работодавците во украинската приватна енергетска компанија „Burisma“. Поранешниот републикански претседател Доналд Трамп тврдеше дека Бајден помладиот добил милиони долари за лобирање за да го „продаде“ пристапот до својот татко. Преписката наводно била пронајдена во лаптопт на Хантер откриена во сервис во сојузната држава Делавер.

Во последните две години од својот претходен мандат, Трамп инсистираше од актуелниот украински претседател Володомир Зеленски да ги обелодени документите според кои тогаш потпретседателот Џо Бајден преземал мерки тогашниот украински претседател Петро Порошенко да го смени државниот обвинител кој ја истражувал „Burisma“ за корупција.

На почетокот од 2023 година во американските медиуми беше објавена информација според којашто постојат планови на Администрацијата на националните архиви и евиденција на САД (FOIA), да ја објават внатрешната преписка во текот на претседателскиот мандат на Барак Обама, кои содржат сведоштва за врските на Хантер Бајден со украинската гасна компанија „Burisma“, чиј член на управниот одбор всушност беше, во времето кога Џо Бајден го извршуваше вториот мандат на потпретседател на САД, за што примал надомест од 83.000 долари месечно иако нема никави квалификации или познавања од овој бизнис.

Според овие написи, администрацијата на Џо Бајден можно е да ставил вето на објавувањето на архивските документи до 2029 година, а што значи дека тие нема да бидат достапни во двете наредни претседателски кампањи во 2024 односно 2028 година. Американските владини агенции имаат можност за правен преседан да дадат такви одговори под изговор да се „избегнат обелоденувања што би можеле да ѝ наштетат на националната безбедност“.

Записите датираат од 2014 година, односно во периодот на превратот во Киев поддржан од САД, во кој клучна улога за соборување на украинската влада која имаше тесни врски со Москва имаше потсекретаркаѕта за политички прашања во администрацијата на Џо Бајден, Викторија Нуланд, вклучуваат 69 слики и 260 е-пораки во кои се споменува „Bursima“.

Електронската пошта од оставениот за поправка лаптоп на Хантер Бајден, до која пристап имал и онлајн весникот DailyMail.com, и сведочењето на „свиркачите“, покажуваат дека тој бил вклучен во повеќемилионски договор со кинески нафтен гигант тесно поврзан со кинеската влада. Банкарските записи покажуваат дека кинеските деловни партнери на Хантер префрлиле 10 милиони долари на конотото на нивното заедничко вложување.

И мејловите, текстовите и сметките од свиркачите сугерираат дека Џо Бајден бил свесен за договорот, па дури и можеби бил вклучен. Најозлогласениот пример е електронската порака од 2017 година од еден од деловните партнери на Хантер, Џејмс Гилијар, кој сугерира дека Хантер би имал 10 отсто од капиталот во договорот во име на „Големиот човек“, што според весникот е сугерирање на неговиот татко.

Сепак, американските мејнстрим медиуми го бранат дека иако во 2014 година поради уживање на кокаин наводно бил отпуштен од резервниот состав на воената морнарица, никогаш не бил дел од кампањата на татко му Џо Бајден и никогаш немал функција во Белата куќа. Самиот Џо Бајден тврди дека со синот не разговара за работењето во странство, и покрај спротивните податоци од писмата кои ги објавија некои американски медиуми, и повеќепати Белата куќа објави дека Министерството за правосудство ќе има незавосност во истрагата за кој и да е член од неговото семејство.