[ФОТО] Путин подготвува пеколен план за НАТО? Шведските медиуми објавија сателитски снимки

Русија ја зголемува воената присутност на границата со Финска – НАТО во состојба на аларм

Ново сателитско разузнавање предизвика сериозна загриженост во НАТО, откако беше откриено дека Русија интензивно ја засилува својата воена инфраструктура долж границата со Финска – потег кој потсетува на подготовките пред инвазијата врз Украина во 2022 година.

Шведската телевизија SVT, повикувајќи се на сателитски снимки добиени од Planet Labs, објави дека во последните недели се забележува значително трупање на руски сили на северозападниот дел од земјата – во близина на граничната линија со Финска, која во април 2023 година стана полноправна членка на НАТО.

Според извештајот, засилена активност е забележана во неколку стратешки точки: Каменка, Петрозаводск, Североморск-2 и Олења. Само во Каменка биле поставени повеќе од 130 воени шатори со капацитет за сместување до 2.000 војници.

Воената инфраструктура која Русија ја гради во овој регион, според западни аналитичари, има слични елементи со трупањето на сили пред почетокот на инвазијата врз Украина, што предизвикува стравувања за можен нов конфликт – овој пат на границата на Алијансата.

Кремљ веќе претходно предупреди дека ќе преземе „воено-технички мерки“ како одговор на приклучувањето на Финска кон НАТО. Според финските власти, последните потези на Москва се гледаат како тестирање на единството на НАТО.

Весa Виртанен, заменик-началникот на одбраната на Финска, во изјава за германскиот медиум Welt, посочува дека Русија не престанува со провокации: „Тие го тестираат членот 5 од НАТО договорот со масовни миграции, сајбер напади, блокирање на GPS сигналите и информативни напади.“

Тој нагласува дека, за време на конфликтот во Украина, во регионот биле распоредени околу 20.000 војници и четири резервни бригади. „Сега гледаме изградба на нова инфраструктура и ново трупање војска. Во иднина, таму ќе има повеќе војници отколку пред почетокот на војната во Украина“, предупреди Виртанен.

Според напис на Wall Street Journal од крајот на април, Русија започнала изградба на нова воена база во Петрозаводск, на околу 160 километри од границата со Финска. Западни воени и разузнавачки извори проценуваат дека базата ќе може да командува со десетици илјади војници, кои би можеле да претставуваат „рбет“ на нови руски сили подготвени за потенцијален судир со НАТО.

Овој развој на настаните се случува во чувствителен момент, кога се очекуваат можни директни мировни преговори меѓу Украина и Русија во Истанбул, што дополнително ја зголемува геополитичката неизвесност.