Градоначалникот на Битола, Тони Коњановски, претпладнево ја посети Клиничката болница во Битола, по повод првиот ден од Новата 2026 година, за да ги поздрави новородените бебиња и нивните мајки. Оваа година, болницата ја дочека првородената женска Бистра и машкото бебе Петар, чии мајки се битолчанки и прворотки.
„Битола доби два нови жители, две малечки души. Првото е женско Бистра, се надевам дека ќе ни ја избистри годината, ќе ни донесе радост и среќа, а второто е Петар. Им посакавме среќа, убавини во животот и уште многу дечиња“, рече Коњановски.
Пригодни подароци и финансиска помош им беа доделени од општината и приватни фирми. Двете бебиња се во добра здравствена состојба, со родилни маси од 3300 и 3460 грама, а директорката на болницата, Ненси Лозанче, истакна дека првороденото женско дете е знак на бериќет за целата година.
Коњановски ја посети и Итната медицинска служба и детското одделение, каде на хоспитализираните деца им подари новогодишни пакетчиња и им посака среќна Нова година.
