Украинскиот претседател Володимир Зеленски изјави дека испораките на системи за противвоздушна одбрана за Украина не можат да бидат одложени, дури ни за време на новогодишните празници. „Убиствата мора да бидат запрени – не може да има пауза во заштитата на животите. Ако нападите не престануваат, испораките не смеат да се одлагаат“, напиша Зеленски на социјалните мрежи.
Тој изрази надеж дека сè што е договорено со Вашингтон кон крајот на декември за заштита на Украина, ќе пристигне навреме. Зеленски додаде дека Русија во новогодишната ноќ лансирала повеќе од 200 дронови кон Украина, главно кон енергетските објекти, при што украинската ПВО успеала да собори 176 од нив.
Зеленски ја нагласи важноста од навремена поддршка за одбрана на животите и инфраструктурата на Украина, истакнувајќи дека нападите продолжуваат без пауза.
