Канада ја разгледува можноста за продлабочување на односите со Европската Унија преку добивање статус на „придружен член“, објавува „Волстрит џурнал“, повикувајќи се на извори запознаени со разговорите.
Според информациите, канадскиот премиер Марк Карни сака да ги зајакне врските со европскиот блок, додека и во ЕУ постои отвореност за модел на поблиска соработка со Канада, без нејзино формално полноправно членство.
Разговорите се одвиваат во период на заладени односи меѓу Канада и САД. Трговските несогласувања со администрацијата на американскиот претседател Доналд Трамп ја поттикнале Отава да бара нови пазари и стратешки партнери.
Канада и ЕУ веќе разговараат за олеснување на движењето на производи, услуги и работници во стратешки сектори. Меѓу областите во кои се разгледува продлабочена соработка се енергетиката, вештачката интелигенција, одбраната и критичните минерали.
На маса се и планови за подморски кабли, заеднички информациски центри, инфраструктура за складирање податоци во облак, нови сателитски мрежи и инфраструктура за испорака на канадска енергија кон европскиот пазар.
Карни, според информациите, разговарал и со повеќе европски лидери, меѓу кои и францускиот претседател Емануел Макрон, за можноста канадските граѓани полесно да живеат и работат во земјите од ЕУ, вклучително и преку олеснување на визното движење.
Карни и Макрон треба да се сретнат на 20 септември на Свети Петар и Микелон, француска територија во близина на канадскиот атлантски брег. Од Елисејската палата соопштија дека средбата ќе биде прва официјална посета на канадскиот премиер на островите.
Сепак, евентуалното создавање нов модел на партнерство меѓу Канада и ЕУ би можело да се соочи со бројни политички и правни предизвици.
Како пример се наведуваат и досегашните проблеми со целосната имплементација на трговскиот договор меѓу Канада и ЕУ. Иако договорот беше постигнат пред повеќе од една деценија и привремено стапи во сила во 2017 година, сè уште не е целосно ратификуван во сите земји членки.
Доколку разговорите продолжат, идејата за „придружно членство“ би можела да претставува сосема нов модел на соработка меѓу ЕУ и земја која не се наоѓа на европскиот континент.
