Во американскиот Конгрес се засилуваат критиките околу законитоста на воените удари врз Венецуела, при што сенатори од двете партии предупредуваат дека интервенцијата нема јасна уставна основа. Демократскиот сенатор од Аризона, Рубен Галего, оцени дека станува збор за „незаконска војна“ и дека администрацијата нема добиено формално одобрение од Конгресот.
Галего, кој е ветеран на Американскиот марински корпус и учествувал во војната во Ирак, преку социјалните мрежи порача дека ова е „втората неоправдана војна“ што ја доживува во својот живот, алудирајќи на повторување на грешките од минатото.
Неговите ставови предизвикаа силни реакции во јавноста и повторно го актуелизираа прашањето за уставната улога на Конгресот во одобрувањето на воени акции. Критики упати и републиканскиот сенатор од Јута, Мајк Ли, кој изјави дека очекува јасно објаснување за тоа како ваквата акција може да се оправда без официјална објава на војна или одобрение за употреба на воена сила.
