Грчките власти започнаа со примена на новиот ценовник за патарините на автопатот „Егнација Одос“. Цените на наплатните рампи се зголемени во просек за 20 проценти, што директно ќе влијае врз трошоците на македонските туристи кои патуваат кон познатите летувалишта.
Првата промена патниците ќе ја почувствуваат веднаш по преминот Евзони. Првата наплатна рампа, лоцирана на само 500 метри од границата, сега наплаќа 2,95 евра за автомобили, што е зголемување за 55 центи.
На обиколницата во Солун (Ореокастро), патарината за автомобили сега изнесува 0,65 евра, додека кај Аспровалта цената е зголемена од 1,1 на 1,40 евра.
Колку ќе ве чини патувањето до најпопуларните дестинации:
Атина: За патување од Солун до главниот град ќе треба да поминете 11 рампи и да платите вкупно 33,25 евра.
Халкидики: Ако патувате преку обиколницата, вкупниот трошок е 3,60 евра (2,95 на Евзони и 0,65 на обиколницата). Преку центарот на Солун се плаќа само на Евзони.
Тасос: Од Евзони има пет наплатни рампи со вкупна цена од 8,55 евра. Преку Дојран, трошокот е 5,90 евра.
Лефкада: Осум наплатни станици ќе ве чинат вкупно 17,10 евра.
Крф, Парга и Врахос: Патарината до овие дестинации изнесува вкупно 13,25 евра.
