Под влијание на силна циклонска активност, во Македонија во наредните денови се очекува нагла и изразена промена на временските услови, информираат од Управата за хидрометеоролошки работи (УХМР).
Влажниот бран ќе започне со обилни врнежи од дожд и засилен ветер, по што со продор на постуден воздух температурите значително ќе опаднат, а дождот постепено ќе премине во снег. Снежна покривка се очекува не само на планините, туку и во дел од пониските места, особено кон крајот на периодот.
Метеоролозите предупредуваат дека локално може да има поинтензивни врнежи, како и краткотрајни проблеми во сообраќајот, особено на повисоките патни правци. Граѓаните се повикуваат на претпазливост, навремена подготовка на возилата и следење на најновите временски прогнози.
Според најавите, зимското утро со бела прекривка е можно веќе во наредните денови, што ќе донесе вистинска зимска атмосфера низ поголем дел од земјата.
