Брзата интервенција на пожарникарите спречи поголема трагедија откако рано утрово избувна пожар на споредниот влез од католичката црква „Име на Марија“ во строгиот центар на Нови Сад. Огнот бил брзо локализиран, а според досегашните сознанија, во инцидентот нема повредени лица.
Првичните информации од локалните медиуми укажуваат дека пожарот не бил случаен, туку намерно предизвикан, при што е причинета материјална штета на страничната врата од катедралата. Надлежните служби водат истрага за да се утврдат околностите и мотивите зад овој чин.
Градоначалникот на Нови Сад, Жарко Миќин, реагираше остро, оценувајќи го настанот како чин на вандализам и насилство што директно ги нарушува основните вредности на градот. Тој порача дека Нови Сад со децении гради имиџ на средина во која владеат толеранција, меѓусебно почитување и слобода на вероисповед, нагласувајќи дека секој напад врз верските објекти претставува напад врз безбедноста и соживотот на сите граѓани.
Свештеникот на црквата, Атила Желер, изјави дека засега немаат конкретни информации за причините за инцидентот и дека очекуваат официјално соопштение од полицијата. Според неговите зборови, се претпоставува дека огнот бил подметнат во раните утрински часови.
„Се сомневаме дека во раните утрински часови некој запалил оган на страничниот влез. Зошто се случило тоа – навистина не знаеме. Особено е тажно што ваков чин се случува токму на Божик,“ изјави Желер, додавајќи дека најважно е што, покрај материјалната штета, нема посериозни последици и светилиштето не е оштетено однатре.
