Швајцарската полиција денеска го уапси сопственикот на барот „Ле Констелејшн“ во познатиот ски-центар Кранс-Монтана, поради сомнение за тешки пропусти кои довеле до една од најсмртоносните несреќи во земјата во последните децении. Во пожарот што избувна во новогодишната ноќ загинаа 40 лица, додека повеќе од 100 беа повредени.
Според резултатите од истрагата, плафонот на локалот бил обложен со лесно запалива звучна изолација, која брзо се запалила откако искрите од прскалките на шампањските шишиња го зафатиле материјалот. Пламенот се проширил со голема брзина, предизвикувајќи паника и хаос меѓу гостите кои се обидувале да избегаат.
Во јавноста дополнително негодување предизвикаа снимки и сведоштва кои сугерираат дека сопственикот, во критичните моменти, наместо да помогне во евакуацијата, се обидувал да ја спаси касата со пари, додека луѓето се бореле за живот.
Градоначалникот на Кранс-Монтана потврди дека барот немал извршена задолжителна годишна противпожарна инспекција уште од 2019 година, иако тоа било законска обврска. Овој пропуст отвори сериозни прашања за одговорноста на локалните власти и контролата на угостителските објекти.
Меѓу загинатите има млади луѓе на возраст од 14 до 39 години, како и државјани на повеќе земји, што ја направи трагедијата меѓународна. Истрагата продолжува, а швајцарските власти најавуваат дека ќе бидат утврдени сите околности и одговорности поврзани со оваа катастрофа.
