Организирани криминални групи од Балканот имаат врски со Венецуела, која се користи како транзитна точка за шверц на кокаин кон Европа. Ова го покажуваат случаи на заплени на дрога, апсења и судски постапки, дел од кои се сè уште во тек.
Венецуела се наоѓа во фокусот на светската јавност по апсењето на поранешниот лидер Николас Мадуро во САД, обвинет дека ја контролирал мрежата за трговија со кокаин која соработувала со мексиканските картели Синалоа и Зетас, колумбиските бунтовници ФАРК и венецуелската банда „Трен де Арагуа“. Мадуро ја негира вината пред судот во Њујорк.
Според Саша Ѓорѓевиќ од Глобалната иницијатива за борба против транснационалниот криминал, Венецуела е „стратешки излезен коридор“ од Латинска Америка кон Атлантикот, од каде кокаинот се пренесува директно кон Европа или преку Западна Африка. За балканските криминални групи, Венецуела е важна, но не и примарна дестинација; поголемо значење имаат Колумбија, Бразил и во последниве години Еквадор.
Поврзаноста беше разоткриена во 2020 година со заплената на пет тони кокаин на бродот „Ареса“ крај Аруба, кој претходно пристигнал од венецуеланското пристаниште Гуарано. Тогаш беа уапсени 11 црногорски државјани, кои во 2021 година добија казни од девет до петнаесет години затвор.
ЕУРОПОЛ поврза со случајот и српскиот државјанин Мирослав Старчевиќ, уапсен во мај 2023 година заедно со 12 лица, обвинети за меѓународна трговија со дрога. Старчевиќ е означен како водач на „најголемата криминална организација за трговија со дрога од Балканот“, поврзана со кавачкиот криминален клан од Црна Гора.
Не е јасно дали балканските групи и понатаму се вклучени во шверцот преку Венецуела. Ниту Србија, ниту Црна Гора не даваат одговор, а ЕУРОПОЛ соработува посредно преку локалните полициски служби.
Венецуела е интересна како транзитна точка бидејќи за транспорт на кокаин се користат и поморски и авионски патишта, вклучувајќи и помали авиони, кои се помалку контролирани од комерцијалните летови. Иако во Венецуела не се произведува кокаин, државата е рангирана меѓу клучните транзитни држави за дрога, со делови од државниот апарат длабоко вклучени во криминалните активности.
Извештаите на Глобалната иницијатива за борба против транснационалниот криминал и UNODC наведуваат дека колумбиските герилски групи во соработка со корумпирани венецуелски функционери го олесниле транспортот на кокаин со минимално насилство, но со значителна контрола врз пограничните региони.
