Патот што води кон тетовското село Бањиче е расчистен и прооден, но поради обилните врнежи од дожд и понатаму постои зголемен ризик од одрони на земја и камења на одредени делници, информира градоначалникот на Општина Тетово, Биљал Касами.
Тој упати апел до граѓаните да се движат со зголемена претпазливост, да ја почитуваат сообраќајната сигнализација и да избегнуваат непотребно движење во ризичните зони, со цел да се спречат евентуални несреќи.
Општинските служби и надлежните институции, како што истакна Касами, и понатаму ја следат состојбата на терен и се подготвени да интервенираат доколку се појават нови одрони или други ризици предизвикани од нестабилното тло.
Градоначалникот нагласи дека безбедноста на граѓаните е приоритет и побара од сите учесници во сообраќајот да покажат одговорност и трпение додека состојбата целосно не се стабилизира.
