Министерот за дигитална трансформација, Стефан Андоновски, најави дека Македонија е на добар пат да ја добие поволната опција „роаминг како дома“ во Европската Унија, со што граѓаните ќе можат да ги користат мобилните услуги во ЕУ по домашни тарифи. Според него, домашните обврски се главната пречка, а нивното завршување се очекува до февруари.
„Нашиот фокус е да ги завршиме домашните задачи, а тоа ќе го направиме до февруари. Потоа следи политичката страна – лобирање и договори на ниво на Македонија со ЕУ и на регионот со Унијата“, изјави Андоновски во интервју за емисијата „360 степени“ на МРТ 1.
Министерот објасни дека за Македонија, како и за другите земји од Западен Балкан, процесот зависи од исполнување на домашните регулативи. Се работи за четири европски регулативи кои треба да се имплементираат во Законот за електронски комуникации, како и еден или два подзаконски акта.
„Ова е едно од најважните прашања за граѓаните, слично по значење како и визната либерализација. Чувството да си дел од поширокиот европски простор и да можеш да ги користиш телекомуникациските услуги без дополнителни трошоци е огромна придобивка“, посочи Андоновски.
Тој истакна дека постои и политички аспект кој влијаел на редоследот на земјите што добиле оваа можност. „Украина и Молдавија беа на ‘брза лента’ поради специјалните околности со војната и бегалците, па тие веќе ја користат оваа поволност. За нас, Црна Гора и Албанија, процесот се очекува да се реализира во текот на 2026 година, откако ќе ги завршиме домашните обврски“, објасни министерот.
Андоновски категорично одби каква било оценка дека Македонија покажува недостаток на иницијатива. „Не е прашање на иницијатива. Уште од почетокот на Берлинскиот процес баравме еднакви услови за роаминг во регионот. Проблемот беше што домашните обврски не беа завршени навреме. Украина и Молдавија имаа политички предност, додека кај нас, Црна Гора и Албанија, договорите треба да се решаваат билатерално“, објасни Андоновски.
Министерот нагласи дека Македонија уште од 2018 година требало да го усогласи Законот за електронски комуникации со европскиот кодекс. „Законот и четири други регулативи сè уште не беа имплементирани. Со новиот Закон за електронски комуникации, донесен во 2025 година, направивме голем напредок, а на крајот од 2025 година дополнително ги доусогласивме“, заклучи Андоновски.
