Романската патријаршија јасно го изрази својот став против иницијативата за легализација на проституцијата, предупредувајќи дека таков потег е во директен судир со православното христијанско учење и со почитта кон човечкото достоинство.
Во официјалното соопштение, црквата ја опишува проституцијата како „сериозна форма на експлоатација и комерцијализација на човечкото тело за финансиска добивка“, која носи длабоки негативни последици за поединецот, но и за целото општество. Патријаршијата предупредува дека легализацијата не само што не ги решава социјалните проблеми поврзани со оваа практика, туку напротив – ги продлабочува: „Таа поттикнува занемарување на човечкото достоинство и води кон морална деградација на општеството.“
Црквата ја потсетува јавноста и на меѓународната обврзаност на Романија. Како потписничка на Конвенцијата на Обединетите нации за сузбивање на трговијата со луѓе, државата е должна да ги забрани сите облици на организирана проституција. „Проституцијата е неспоивa со достоинството на човечката личност и ги загрозува благосостојбата на поединецот, семејството и заедницата“, се наведува во документот.
Во објаснувањето на црковниот став, Патријаршијата се повикува на Светото писмо и традиционалното православно учење. Проституцијата, според ова учење, е „неспојлива со духовниот живот“ (сп. Второзаконие 23:17; 1 Сол. 4:3), а човечкото тело е „храм на Светиот Дух“ (1 Кор. 6:19). Секој облик на сексуална експлоатација или понижувачка употреба на телото, предупредуваат од Патријаршијата, оставува трајни физички, психолошки и духовни последици.
Патријаршијата истакнува дека легализацијата не би ја спречила трговијата со луѓе и не би го намалила ризикот од сексуална експлоатација. Напротив, постои реална опасност да се создаде правна рамка која би овозможила ширење на практики што се неспоиви со човечката слобода и достоинство.
„Во моментот кога законодавни иницијативи јасно се спротивставуваат на моралните вредности и на учењето на Православната црква, нашата должност е јавно да реагираме“, порачаа од Романската патријаршија, нагласувајќи ја потребата од цврст и недвосмислен став.
Со ова соопштение, црквата не само што ја потврдува својата морална позиција, туку и повикува на заштита на човечкото достоинство и духовните вредности во современото општество во Романија.
