Потрагата по уште пари и докази против апелацискиот судија Ѓоко Ристов продолжува, по претходно откриениот сомнителен имот. Деновиве во домот на неговите родители во Неготино беа пронајдени 350.000 евра скриени во ѕид, за кои истрагата проценува дека се без покритие.
Од Обвинителството за гонење организиран криминал и корупција (ОЈО-ГОКК) истакнуваат дека јавниот обвинител во наредните денови ќе одлучи за мерки за обезбедување на присуство на осомничениот.
Пред една недела Ристов информирал дека заминува на боледување, по што не се појавил на работа, а неговиот мобилен телефон не е во употреба веќе повеќе од еден месец. Ова се случува откако се отвори истрагата против адвокатот Фехми Стафа за поткупување судија во Скопска апелација.
Според истрагата, Стафа му дал поткуп на Ристов во име на бизнисменот Љупчо Пецов, познат како Ѓаволот, кој до неодамна бил во бегство. Обвинителството потврдува дека истрагата е дел од поширока постапка за противправно стекнување и прикривање имот, како и корупција и трговија со влијание во Апелацискиот суд Скопје.
