Утринскиот сообраќаен шпиц во Бутел денеска беше дополнително отежнат откако уште еден двокатен автобус на ЈСП излезе од функција и ја блокираше крајната десна лента на булеварот „Христијан Тодоровски-Карпош“.
Возилото остана заглавено во близина на автобуската постојка кај поранешната Албанска амбасада, принудувајќи ги возачите да маневрираат и да го заобиколуваат токму во најгустата фреквенција на сообраќајот.
Овие автобуси, кои беа дел од големата набавка реализирана во 2010 година преку договор со кинескиот производител „Zhengzhou Yutong Group“, пристигнуваа во Скопје во периодот од 2011 до 2013 година. Иако некогаш симбол на модернизацијата на јавниот превоз, денес сè почесто се причина за застои и проблеми.
Во изминатите години, дефектите станаа речиси секојдневие, а дел од автобусите редовно се повлекуваат од сообраќај поради недостиг на резервни делови. Дополнително загрижува фактот што не се ретки ниту инцидентите со нивно палење на улица, што уште повеќе ја отвора дилемата за нивната безбедност и одржливост.
