Русија ја поддржува продажбата на НИС на унгарската компанија МОЛ, оценувајќи ја како „заеднички корисна и во национален интерес“. Ова го изјави министерот за надворешни работи на Русија, Сергеј Лавров, истакнувајќи дека Москва е отворена за соработка со сите страни, вклучително и со Соединетите Американски Држави, во врска со трансакцијата.
Во понеделникот, „Гаспромњефт“ потврди дека потпишал договор за намери со МОЛ за продажба на 56,15 отсто од акциите во Нафтената индустрија на Србија (НИС). Претходно, унгарската компанија соопшти дека веќе има склучено обврзувачки прелиминарен договор со рускиот енергетски гигант.
За да се комплетира трансакцијата, ќе биде потребно одобрение од Министерството за финансии на САД, како и од српските надлежни институции. Според најавите на страните, конечниот договор за купопродажба се очекува да биде потпишан најдоцна до 31 март.
