По снежните врнежи што ја зафатија Битола во текот на денешниот ден, сите улици во градот се целосно проодни, а сообраќајот се одвива непречено, информира градоначалникот Тони Коњановски преку социјалните мрежи.
Во објавата Коњановски посочи дека екипите на јавните претпријатија биле постојано на терен и интервенирале во текот на целиот ден и вечерта, со цел расчистување на снегот и одржување на патната инфраструктура.
Според информациите, снежните врнежи започнаа во утринските часови и во одредени делови на градот предизвикаа отежнат сообраќај, особено на споредните улици и во повисоките населени места. Поради интензитетот на врнежите, на моменти доаѓаше до повторно натрупување снег и лизгави коловози, што создаде реакции кај граѓаните.
Во текот на денот, механизацијата на ЈП „Комуналец“ и останатите надлежни служби беше ангажирана со чистење на главните булевари, крстосници и приоритетни сообраќајници, по што интервенциите продолжија и кон споредните улици. Со дополнително фрлање сол и ризла, состојбата постепено се стабилизираше.
Вечерва, како што покажуваат и објавените снимки од централните сообраќајници, улиците се исчистени, коловозите се влажни но проодни, а сообраќајот се одвива без застои.
„Сите улици во Битола се проодни. Сообраќајот се одвива непречено“, порача Коњановски, додавајќи дека службите и понатаму ќе останат во приправност доколку има нови врнежи или пад на температурите.
Од Општина Битола апелираат до возачите да бидат внимателни, да ја прилагодат брзината на условите на патот и да користат соодветна зимска опрема.
ВИДЕОТО МОЖЕ ДА ГО ПОГЛЕДНЕТЕ ТУКА
