По три и пол години од шокантниот атентат кој ја потресе Јапонија, Тетсуја Јамагами доби доживотна казна затвор за убиството на поранешниот премиер Шинзо Абе. Инцидентот се случи на 8 јули 2022 година во западниот град Нара, за време на изборен митинг, кога Јамагами, вооружен со рачно изработен пиштол, испука два куршуми кон Абе.
45-годишниот Јамагами на почетокот од судењето минатата година се изјасни за виновен, но јапонската јавност долго време се расправаше за тоа колкава казна е соодветна. Некои го нарекуваат ладнокрвен убиец, додека други ја потенцираат тешката животна приказна која го обликувала.
Мотивот за злосторството, според објавените судски детали, лежи во личната огорченост на Јамагами кон Абе поради врските на поранешниот премиер со контроверзната Црква на обединување. Членството на неговата мајка во оваа организација ги довело семејните финансии до банкрот – таа ја донирала полисата за животно осигурување на покојниот татко и друг имот вреден околу 100 милиони јени (околу 828.750 американски долари).
Обвинителството инсистираше на доживотна казна, истакнувајќи дека убиството на поранешниот премиер било „исклучително сериозно дело“. Одбраната, пак, побара помала казна, аргументирајќи дека Јамагами бил под влијание на „религиозно злоставување“ и дека неговите дејствија биле резултат на длабока лична и семејна трагедија.
Сам Јамагами за време на судењето призна дека го извршил убиството: „Сè е вистина. Нема сомнение дека јас го направив тоа“, рече тој на првиот ден од судењето во октомври 2025 година. Тој објасни дека неговата првична цел биле службениците на црквата, но видеопораката од Абе во 2021 година го навела да насочи гневот кон поранешниот премиер.
Убиството на Абе го потресе јапонското општество, познато по многу ниската стапка на насилство со оружје, и остави неизбришлива трага во политичкиот живот на земјата. Судската одлука сега ја стави точката на еден од најтешките и најконтроверзни случаи во современата историја на Јапонија.
