Министерката за енергетика, рударство и минерални суровини, Сања Божиновска, денеска го посети Средното електротехничко училиште „Михајло Пупин“, каде што се запозна со условите во кои учениците се обучуваат за идните професии во енергетскиот сектор.
Божиновска истакна дека современите лаборатории и практичната настава се клучни за подготовка на квалитетни кадри, нагласувајќи дека токму вакви млади луѓе ѝ се потребни на државата за да обезбеди стабилен, модерен и одржлив енергетски систем.
„Енергетската транзиција не се случува сама од себе. Таа почнува во училниците, со знаење, со стручно образование и со млади кадри подготвени да ја носат одговорноста утре“, порача министерката.
Таа додаде дека Министерството активно вложува во поврзување на образованието со реалните потреби на енергетиката, преку директна комуникација со учениците и поддршка на стручното образование.
„Без млади кадри – нема енергетска транзиција“, истакна Божиновска, посочувајќи дека учениците кои денес се обучуваат во вакви услови се иднината на македонската енергетика.
