Украинскиот претседател Володимир Зеленски изјави дека датумот на завршување на војната ќе биде дефиниран преку договор за безбедносни гаранции што треба да биде обезбеден од страна на Соединетите Американски Држави.
Во меѓувреме, заменик-министерот за надворешни работи на Русија, Сергеј Рјапков, изјави дека ова прашање веќе било отворено во разговорите со американскиот претседател Доналд Трамп за време на средбата во Енкориџ. Според Рјапков, рускиот претседател Владимир Путин по таа средба му предложил на Трамп наредната средба да се одржи во Москва, но нагласи дека најавената иницијатива досега нема конкретен практичен напредок.
Паралелно со дипломатските изјави, во Европската Унија стапи на сила ограничена слобода на движење за руските дипломати, мерка која дополнително ги заострува односите меѓу Брисел и Москва.
Портпаролот на Кремљ, Дмитриј Песков, остро ја критикуваше Европската Унија, оценувајќи дека нејзиното раководство е составено од функционери кои, според него, немаат визија за иднината. Тој истакна и дека Русија нема намера да води какви било разговори со високата претставничка за надворешна политика на ЕУ, Каја Калас.
