Обвинителите што ја истражуваат страшната несреќа во Тимиш во која животот го загубија седум грчки навивачи потврдуваат дека возачот на минибусот седел зад воланот пијан и дрогиран, објави романскиот медиум Обсерватор.
Обвинителите се потпираат на официјалните резултати од Националниот институт за судска медицина (INML) кои покажуваат дека возачот консумирал канабис, кокаин и алкохол пред да седне зад воланот.
Истражителите побарале такво токсиколошко вештачење од INML за сите починати, но досега резултатите се добиени само за возачот.
Во врска со хипотезата дека правецот на минибусот бил блокиран од системот „помош во движење во лента“, обвинителите тврдат дека немаат информации што би го поткрепиле ова сценарио.
„Се спроведуваат истраги IN REM во однос на сторени кривични дела телесна повреда од небрежност и убиство од небрежност. Во овој случај, INML состави извештај за токсиколошка анализа за да утврди присуство на психоактивни супстанции во крвта на возачот. Резултатот потврди присуство на две психоактивни супстанции во крвта, имено канабис и кокаин. Потврдено е и присуство на алкохол. Пронајдени се два плика за кои постои сомневање дека содржат психоактивни супстанции, но сè уште немаме официјални резултати во врска со ова “, изјави Берта Серена Константинеску , портпаролка на Обвинителството при Судот во Лугој.
