Од утре официјално започнува со работа полицискиот систем „Сејф Сити“, кој автоматски ќе ги регистрира и санкционира сообраќајните прекршоци низ Скопје. Во првата фаза, системот ќе детектира надминување на дозволената брзина, поминување на црвено светло, непрописно запирање и паркирање, како и управување со нерегистрирано возило.
Според најавите, најстрого ќе се санкционира поминувањето на црвено светло, за што е предвидена глоба од 250 евра и одземање на возачката дозвола во период од три до 12 месеци. За пречекорување на дозволената брзина, казните ќе се движат од 15 до 300 евра, во зависност од степенот на прекршокот.
Непрописното запирање и паркирање ќе се казнува со глоби од 25 до 180 евра, додека управувањето со нерегистрирано возило ќе чини меѓу 100 и 500 евра. Од Министерството за внатрешни работи потсетуваат дека глобите може да се намалат за 50 отсто доколку се платат во рок од осум дена.
Иако казните се високи, од МВР нагласуваат дека целта на „Сејф Сити“ не е репресија, туку зголемување на сообраќајната култура и безбедноста на сите учесници во сообраќајот. Во пресрет на стартот на системот, веќе е забележливо посмирено и повнимателно возење низ градот.
