Американскиот претседател Доналд Трамп објави дека Соединетите Американски Држави и Индија постигнале значаен трговски договор, по телефонски разговор со индискиот премиер Нарендра Моди, оценувајќи го договорот како голем исчекор во билатералните односи меѓу двете земји.
Според изјавата што Трамп ја објави на својата социјална мрежа Truth Social, договорот предвидува намалување на реципрочната царина што САД ја применуваат кон Индија – од досегашните 25 на 18 отсто. Американскиот претседател нагласи дека одлуката е донесена „од пријателство и почит“ кон Моди и дека ќе стапи на сила веднаш.
Освен трговијата, разговорот меѓу двајцата лидери ја опфатил и војната во Украина. Во тој контекст, Трамп тврди дека Индија се согласила да престане со купување руска нафта и наместо тоа значително да го зголеми увозот на енергенси од САД, а можно и од Венецуела. Според него, ваквиот потег би можел да има пошироки геополитички последици и да придонесе кон ставање крај на конфликтот во Украина.
Трамп дополнително наведе дека Индија се обврзала да ги укине царините и нецаринските бариери за американските производи, сведувајќи ги на нула, како и драстично да го зголеми увозот на американска стока во рамки на политиката „Купувај американско“.
Како дел од договорот, американскиот претседател најави дека Индија ќе купува американски енергетски, технолошки, земјоделски и други производи во вредност поголема од 500 милијарди долари – сума што тој ја оцени како историска.
На крајот, Трамп изрази уверување дека партнерството меѓу Вашингтон и Њу Делхи ќе продолжи да се продлабочува, истакнувајќи дека тој и премиерот Моди „не зборуваат празно, туку испорачуваат конкретни резултати“.
