Пазарот на криптовалути доживеа сериозен пад во последните денови, губејќи приближно 467,6 милијарди долари од својата вредност, покажуваат податоците на „Коин Геко“. Биткоинот, главната криптовалута, се тргуваше на 15-месечно дно од 72.877 долари, пред малку да се стабилизира на околу 76.600 долари во средата наутро во Лондон.
Падот следува по забрзаната распродажба на криптовалути, која почна веднаш по победата на Доналд Трамп на претседателските избори во САД на почетокот на ноември 2024 година, кога инвеститорите почнаа да реагираат на можноста за администрација попријателска кон криптовалутите.
И покрај континуираната поддршка од Белата куќа и растечкото институционално усвојување, биткоинот е во пад од рекордот достигнат на почетокот на октомври, со вредност намалена за околу 40%. Падот следува по серијата ликвидации на 10 октомври, кога 19 милијарди долари во левериџирани токени беа избришани, а поширокиот криптопазар сè уште не се опорави.
„Расположението во азиските пазари е претпазливо и дефанзивно. Сè уште постои отпор кон ризикот, но присилната продажба забави во споредба со затворањето во САД“, коментира Рејчел Лукас, аналитичарка во „БТЦ Маркетс“. Таа додава дека падот на биткоинот под 73.000 долари создаде екстремен страв меѓу инвеститорите.
Неделата беше бурна и за глобалните пазари, со остри осцилации на цените на златото и среброто. Додека скапоцените метали привлекоа купувачи по неодамнешните загуби, криптовалутите не успеаја да пронајдат стабилна поддршка. Инвеститорите побараа „безбедни засолништа“ во услови на растечки тензии меѓу САД и Иран, што ја истакна слабоста на биткоинот како потенцијално дигитално злато.
Познатиот инвеститор Мајкл Бери предупреди дека биткоинот останува чисто шпекулативна актива, неспособна да се етаблира како хеџ сличен на традиционалните скапоцени метали.
Во последните 24 часа, повеќе од 700 милиони долари во биковски и мечкини облози беа ликвидирани на пазарот на фјучерси, што ја зголеми вкупната загуба од 29 јануари на над 6,67 милијарди долари.
И фондовите за тргување со биткоин на американските берзи продолжуваат да покажуваат нестабилност. Нето приливите од 562 милиони долари во понеделникот беа делумно повлечени наредниот ден, со оттегнување на 272 милиони долари, покажуваат податоците на „Блумберг“.
„Некогаш постоеше речиси религиозно верување во тоа дека треба да се држи биткоин без разлика на се“, изјави Мајкл Новограц, извршен директор на „Галакси Диџитал“. „Но, таа треска се распадна, и почна масовната продажба.“
