Во чест на роденденот на Гоце Делчев, Националната универзитетска и јавна библиотека „Св. Климент Охридски“ во Битола отвори изложба која го доловува животот, делото и идеалите на еден од најзначајните македонски револуционери.
Посетителите ќе можат да се запознаат со фотографии, архивски материјали од периодични списанија и податоци што ја прикажуваат борбата на Делчев за слобода, како и неговата визија за праведно и достоинствено општество.
„Гоце Делчев не беше само борец за ослободување, туку и визионер кој веруваше во единството и културниот развој на народот. Неговата мисла продолжува да инспирира“, велат од НУУБ „Св. Климент Охридски“-Битола.
Во рамки на изложбата се истакнува и неговата позната изјава: „Јас го разбирам светот како поле за културен натпревар меѓу народите.“ Посетата на оваа поставка е повеќе од историска: тоа е можност да се потсетиме на значењето на слободата, човековото достоинство и визионерската мисла што Гоце Делчев ја остави како траен аманет.
