Министерството за животна средина и просторно планирање официјално ја започна постапката за донесување на Закон за прогласување на Белчишко Блато за заштитено подрачје во категорија IV – Парк на природа.
Белчишко Блато, лоцирано во општина Дебрца, претставува значајно влажно живеалиште со висока биолошка разновидност. Подрачјето е важно за зачувување на ретки и загрозени растителни и животински видови, како на национално, така и на ниво на Европската унија. Исто така, ова подрачје има значајна улога во одржување на природната рамнотежа и екосистемските услуги во регионот. Белчишко Блато веќе е идентификувано како идно Натура 2000 подрачје.
Во рамките на постапката за донесување на Законот се предвидени јавни консултации со граѓаните и засегнатите страни. Јавното известување е објавено на интернет страницата на Министерството (www.moepp.gov.mk) и на Единствениот национален електронски регистар на прописи (ЕНЕР) на РСМ (http://www.ener.gov.mk/).
Граѓаните и организациите имаат можност да достават коментари, мислења и предлози во рок од 20 дена од денот на објавувањето на предлог Законот. Дополнително, Министерството најавува дека во текот на постапката може да се организираат и директни консултации, состаноци со засегнатите страни, како и јавна расправа доколку се утврди потреба.
Забелешки и предлози може да се испраќаат електронски на e-mail адресите на:
- Билјана Тешева Ѓорѓиевска: b.tesheva@moepp.gov.mk
- Влатко Трпески: v.trpeski@moepp.gov.mk
- Кузман Куновски: k.kunovski@moepp.gov.mk
Исто така, мислења можат да се дадат и преку веб порталот на ЕНЕР.
Од Министерството потенцираат дека учеството на јавноста е од клучно значење за обезбедување квалитетна и одржлива заштита на Белчишко Блато, која ќе ги зачува природните вредности, но и интересите на локалното население.
