На денешната средба помеѓу Владата и претставниците на Синдикатот на работниците од управата, правосудството и здруженија на граѓани (УПОЗ), постигнат е начелен договор за зголемување на платите на административните службеници. Како што изјави претседателот на УПОЗ, Трпе Деаноски, договорот прво треба да се стави на хартија, а потоа за него ќе се изјаснат телата и органите на синдикатот.
Според договореното, платите на административците ќе се зголемуваат по осум отсто секоја година во наредните три години. „Мило ми е што Владата го прифати барањето на УПОЗ, иако не во целост, сепак додатоците на плата ќе бидат исплатени на вработените од администрацијата и правосудството“, истакна Деаноски.
Тој нагласи дека зголемувањата ќе се реализираат во три рати по осум проценти, почнувајќи од март годинава, но конечниот збор ќе го имаат органите и телата на синдикатот преку гласање за поединечните колективни договори. „Доколку колегите го прифатат договорот, нема пречки за негово потпишување. Доколку не, Владата ќе добие наши забелешки и можно е вработените да бараат повисок износ“, додаде Деаноски.
Премиерот Христијан Мицкоски објасни дека, според владината формула, пример за администратор со плата од 35.000 денари, со првото зголемување од 1.500 денари, платата ќе изнесува 36.500 денари. Зголемувањата ќе се повторуваат и во 2027 и 2028 година, со што вкупниот пораст за три години ќе изнесува минимум 40% од почетниот износ.
