Министерот за здравство, Азир Алиу, го посети Институтот за трансфузиона медицина при Клиничката болница во Тетово, каде се врши обемна реконструкција која започна на почетокот на 2024 година. Во овој проект, Институтот инвестира околу 8,3 милиони денари, односно приближно 134.000 евра, со цел модернизирање на просториите и подобрување на условите за пациентите.
„Центарот за трансфузија во Тетово е еден од клучните регионални центри, кој сега ги исполнува сите стандарди за обезбедување квалитетни здравствени услуги. Стратегијата на Министерството е јасна – дисперзија на здравствените услуги низ целата држава. Нашата цел е не само да ги унапредиме технологиите, туку и да создадеме нови можности за развој на Центарот“, изјави министерот Алиу.
Регионалниот центар во Тетово функционира и како центар за поддршка на три помали филијали во Гостивар, Кичево и Струга, овозможувајќи подобар пристап до трансфузиона грижа за пациентите од поширокиот регион.
Покрај модернизацијата на здравствената инфраструктура, Алиу се осврна и на улогата на Министерството во регулирањето на производството на канабис за медицински цели. Тој нагласи дека секоја фирма што сака да произведува таков вид медицински производ мора да добие лиценца од Министерството за здравство. „Според протоколите, компаниите ни доставуваат извештаи на секои три месеци. Имаме и годишни инспекции, како и ад хок контроли кога е потребно. Секое пренесување на производите помеѓу институциите мора да биде известено до нас, а ако се надвор од нашите протоколи, надлежност има Министерството за внатрешни работи“, објасни Алиу.
