Во ек на празничниот викенд, вистински бран патувања ја зафати Македонија, при што за само 12 часа над 20.000 граѓани ја напуштиле државата и заминале во странство.
Според податоците од Министерството за внатрешни работи, најголем дел од сообраќајот бил регистриран на граничниот премин Богородица. Во период од 24 часа, во земјата влегле 7.945 граѓани, додека 7.954 ја напуштиле државата.
Во истиот период, преку овој премин во Македонија влегле 3.098 странски државјани, додека 2.708 ја напуштиле земјата.
Зголемена фреквенција е забележана и на граничниот премин Блаце, каде 3.040 македонски државјани излегле од земјата, додека 1.979 влегле. Кај странските државјани, 6.339 влегле, а 4.430 ја напуштиле Македонија.
Од МВР информираат дека се ставени во функција сите човечки и технички капацитети за да се забрза протокот на патници и да се намалат гужвите на граничните премини.
Ваквата појава не е изненадување, бидејќи, како што посочуваат надлежните, веќе станува пракса голем број македонски граѓани да ги користат продолжените викенди за патување во странство, особено кон соседните земји и туристичките дестинации.
