Хавана е на работ на енергетска блокада откако Соединетите Американски Држави го запреа извозот на нафта кон Куба, предизвикувајќи недостиг на гориво за авионите и сериозни нарушувања во воздушниот сообраќај. Кубанските власти предупредија дека од утре до 11 март авио‑гориво ќе биде многу ограничено, што го става туристичкиот сектор под голем притисок.
Неколку меѓународни авиокомпании веќе се принудени да суспендираат летови кон Куба. Најпогодени се Ер Канада и Вест Џет, кои ги откажаа или презакажаа повеќето летови, оставувајќи стотици туристи привремено заглавени. За да ги врати патниците дома, Ер Канада најави специјални празни „ferry flights“ кон Куба за да ги префрли околу 3.000 патници во Канада. Други превозници како Air Transat, Иберија и Луфтханза исто така се соочуваат со проблеми, па дел од авионите мораат да слетаат во соседни земји за да наполнат гориво.
Ситуацијата е резултат на блокадата на нафтата од Венецуела, која Куба ја добиваше редовно до средината на декември. Сега, под заканите на администрацијата на Доналд Трамп дека ќе санкционира секој кој ѝ помага на Хавана да заобиколи санкциите, кризата дополнително се влошува.
Во меѓувреме, Кина изрази цврста поддршка за Куба, најавувајќи помош во справувањето со кризата и нагласувајќи дека се противи на странско мешање. Портпаролката на кинеското Министерство за надворешни работи, Лин Џиан, потенцираше дека нема кинески државјани кои се заглавени на островот поради прекинатите летови.
