Во потег што изненади многу финансиски експерти, матичната компанија на Google, Alphabet, оваа недела издаде обврзница која ќе достигне зрелост дури во 2126 година – речиси еден век од сега. Станува збор за дел од серија задолжувања вредни милијарди долари, чија цел е да се финансираат амбициозните планови на компанијата за вештачка интелигенција.
Обично, компаниите кои сакаат да соберат капитал имаат две опции: продажба на акции или обврзници. Google избра второто, но изборот на 100-годишен долг го направи моментот навистина сензационален. Во свет каде што дури и компании со четиритрилионска пазарна вредност и над 73 милијарди долари годишен слободен паричен тек како Google се свртуваат кон долгови, зборуваме за финансиска стратегија со необичен историски екстрем.
Причината е тоа што Google планира да ги удвои трошоците за вештачка интелигенција оваа година, односно да потроши неверојатни 185 милијарди долари, што дури и за нивните 126 милијарди долари готовина не изгледа доволно.
Но, обврзниците од векот се ретки токму поради една причина: компаниите едноставно не траат толку долго. Историјата покажува дека такви долгови често се ризични. IBM, на пример, ја издаде својата 100-годишна обврзница во 1996 година, но вобрзо изгуби дел од својата доминација поради појавата на Microsoft и Apple. Слично, Џеј Си Пени продаде обврзници од векот во 1997 година, кои 23 години подоцна вредеа само дел од почетната сума. Дури и Моторола, последната американска компанија која издаде ваков долг, и покрај тоа што го сервисираше долгот, ја загуби доминацијата на пазарот, потсетува инвеститорот Мајкл Бери.
Овие примери ја илустрираат класичната вистина: долг со вековна зрелост е повеќе симбол на самодоверба и визија за иднината отколку сигурна инвестиција за просечен граѓанин. Таквите обврзници најмногу имаат смисла за институционални инвеститори со долгорочни обврски – пензиски фондови, универзитетски фондации и компании за животно осигурување.
Сепак, пазарот го поздрави потегот на Alphabet со ентузијазам. Само за помалку од 24 часа, компанијата собра речиси 32 милијарди долари, со продажба на долг деноминиран во американски долари, британски фунти и швајцарски франци. Побарувачката беше скоро десет пати поголема од понудата, што покажува дека довербата во иднината на Google е силна – или барем, дека пазарот е подготвен да се клади на неа.
