Турскиот парламент вчера беше сцена на хаос за време на полагањето на заклетвата на новиот министер за правда, Акин Гурлек. Конфликтот избувна кога пратеници од опозициската Републиканска народна партија (ЦХП) се обидоа да го попречат неговото назначување. Следеше туркање и физички инциденти меѓу членовите на владејачката Партија за правда и развој (АКП) и опозицијата, по што седницата беше привремено прекината околу 15 минути.
Откако ситуацијата се смири, Гурлек ја положи заклетвата, додека дел од опозициските пратеници фрлаа копии од Уставот кон претседателот на парламентот како знак на протест. ЦХП го оцени назначувањето како удар врз демократските принципи, додека АКП истакна дека целата процедура е изведена во согласност со Уставот.
