Украинскиот претседател Володимир Зеленски ја потврди својата подготвеност за разговори со рускиот лидер Владимир Путин, но со јасна и недвосмислена граница: средбата не смее да се одржи ниту во Москва, ниту во Минск.
„Русија нè нападна, тие се агресорот. Не можам да заминам во главниот град на земја што врши воена агресија врз нашата земја“, изјави Зеленски за време на прес-конференција. Според него, јавните покани од руска страна за средба не се новост, но Украина останува принципиелна: разговорите можат да се одвиваат само на територија на трета, неутрална земја.
Киев е отворен за предлозите на Соединетите Американски Држави за можни разговори во Европа или САД, а Зеленски дополнително ја истакна поддршката за идејата за „неутрални земји“ како домаќини, со експлицитно исклучување на Русија и Белорусија.
Ова следи по 28 јануари, кога рускиот претседателски помошник Јуриј Ушаков објави дека Зеленски бил поканет во Москва, со гаранција за безбедност. Украинскиот лидер, меѓутоа, категорично ја отфрли оваа можност, нагласувајќи дека не би било реално ниту да се сретне со Путин во Киев.
Во меѓувреме, Зеленски ја поздрави иницијативата на францускиот претседател Емануел Макрон за обновување на контактите со Москва, оценувајќи дека секоја политичка иницијатива што може да доведе до решение заслужува внимание.
