Грчките власти привеле државјанин на Грузија на аеродромот во Атина, непосредно пред неговото заминување од земјата, откако тој бил под надзор најмалку 20 дена, јавуваат извори од Атина за МИА. Според истрагата, се сомнева дека мажот фотографирал и следел делови од воената база Суда на островот Крит.
Локалните медиуми објавуваат дека истражителите проверуваат дали грузискиот државјанин можел да шпионира и да има контакти со Иран. Во рамки на истрагата се анализира дигиталниот материјал кој го поседувал, а на подоцнежна фаза ќе се одлучува дали против него ќе биде подигната обвинение и формално уапсен.
Информациите покажуваат дека во неговиот телефон имало фотографии од американскиот носач на авиони USS Gerald Ford, а исто така, преку апликација, примал информации директно од ирански извори.
Мажот пристигнал во Грција од Германија на почетокот на февруари и се сместил во градот Ханија, во непосредна близина на воената база во Суда. Националната разузнавачка служба на Грција го следела неговото движење, а апсењето се случило вчера на аеродромот во Атина, непосредно пред тој да ја напушти Грција.
